RAEM (MAKAU) – Tuir Konvite hosi Ministériu Públiku Rejiaun Administrativa Espesiál Macau nian, konvida Proukuradoria-Jerál Repúblika Timor-Leste ne’ebé xefia hosi Prokuradór-Jerál Repúblika Dr. José da Costa Ximenes ho nia delegasaun sira, hala’o vizita ofisiál ba Macau iha loron 22 to’o 25, fulan Abril 2018 foin lailais ne’e.
Iha loron 23, fulan Abril, Prokuradora-Adjunta, Dra. Ma Iek, nu’udar Prokuradór Substitutu, no majistradu Ministériu Públiku RAEM nian halo enkontru ida ho delegasaun timorense, hodi ko’alia kle’an liu tan kona-ba atribuisaun no funsionamentu servisu sira iha Ministériu Públiku entre parte rua nian, situasaun jerál kona-ba sira nia pesoál, kombate kriminalidade, mekanizmu sira kona-ba kooperasaun judisiáriu no seluk-seluk tan, no manifesta sira-nia hanoin hodi hametin relasaun no haforsa kooperasaun entre sira. Hafoin ida-ne’e delagasaun timorense halo vizita ba iha Servisu Asaun Penál nian hodi buka hatene kona-ba funsionamentu Ministériu Públiku RAEM nian.
Ho hanoin atu dezempeña papél Macau nian hanesan ponte ligasaun entre China ho paíz sira Língua Portuguesa, delegasaun timorense liuhosi koordenasaun Ministériu Públiku RAEM nian no ho apoiu Gabinete Ligasaun Governu Sentrál iha RAEM no Prokuradoria Suprema Populár, nune’e iha loron 26 to’o 27, fulan Abril, desloka bá sidade Shenzhen, Provínsia Guangdong, hodi halo interkámbiu ho Prokuradoria Populár Shenzhen nian, ho nune’e hodi hametin interasaun entre prokuradoria sira Interiór China ho paíz sira Língua Portuguesa nian.
Durante iha RAEM, delegasaun timorense mós halo vizita iha Tribunál Ùltima Instánsia, Komisaun Independente kontra Korrupsaun, Sentru Formasaun Jurídika no Judisiária, no seluk-seluk tan ne’ebé iha relasaun ho justisa ho aspetu oi-oin. (Responsavel/PJR)