Adjuntu Prokuradór-Jerál sira hetan nomeasaun, demisaun no ezonerasaun hosi Prezidente Repúblika, wainhira rona tiha Konsellu Superiór Ministériu Públiku (art.° 14.°/1, Estatutu Ministériu Públiku – EMP), entre Prokuradór Repúblika no Juís-de-direitu sira ne’ebé ho kategoria la inferiór hosi 1ª klase, iha komisaun servisu ba períodu tinan tolu, ne’ebé bele renova dala ida de’it ba períodu hanesan (art.° 14.°/2, EMP).
Adjuntu Prokuradór-Jerál sira iha Prokuradór-Jerál Repúblika nia dependénsia direta, no hetan ninia supervizaun kona-ba ezersísiu kompeténsia sira ne’ebé sira hetan liu hosi despaxu ka tuir lei (art.° 15.°, EMP).
Hahú hosi loron-15, fulan-agostu, tinan-2012, kargu ne’e okupa hosi Zélia Trindade.
-
Haree kurríkulu hosi Adjunta Prokuradór-Jerál Repúblika, Zélia Trindade.
Zélia Trindade moris iha loron-22, fulan-dezembru, tinan-1969, iha Munisípiu Viqueque. Ramata lisensiatura iha Direitu iha Universidade Jember, Surabaya – Indonézia, iha tinan-1998.Tama iha setór justisa durante períodu Administrasaun Tranzitória Nasoins Unidas nian iha Timor-Leste, simu pose nu’udar Prokuradora Públika iha loron-20, fulan-jullu, tinan-2000. Iha tinan-2004, nu’udar membru inspetora Polísia Nasionál Timór-Leste nian. Nu’udar mós konselleira iha organizasaun naun-governamentál Pás no Demokrasia no Jéneru no Igualdade iha tinan-2005, no daudaun ne’e nu’udar konselleira ALFeLa nian (Asisténsia Legál ba Feto no Labarik).
Ho regulamentu ba karreira majistradu sira-nian iha Timor-Leste, nia ramata ho susesu I Kursu Formasaun ba Majistradu no Defensór Públiku sira, ne’ebé realiza iha tinan-2004 to’o tinan-2007. Hetan kolokasaun iha Prokuradoria Repúblika Distritál Dili to’o, iha fulan-jullu, tinan-2010, hetan nomeasaun ba Prokuradora Repúblika Distritál Suai.
Hetan nomeasaun ba kargu Adjunta Prokuradór-Jerál Repúblika iha loron-15, fulan-agostu, tinan-2012, no, iha loron-27, fulan-setembru, tinan-2015, hafoun fali ninia komisaun servisu.
Atualmente, liuhosi delegasaun kompeténsia Prokurador-Jerál Repúblika, José da Costa Ximenes, nia kordena Servisu Sentrál Kontensiozu Estadu nian, mak hanesan área espesializada Ministériu Públiku nian ne’ebé responsabiliza atu reprezenta no defende interese Estadu nian iha Tribunál sira; kordena, dirije no ezekuta intervensaun MP nian iha matéria sível, administrativa, fiskál no kontas ne’ebé Estadu sai nu’udar parte, promove ezekusaun ba desizaun judisiál sira atu iha lejitimidade; no akompaña kompozisaun extrajudisiál konflitu interese nian ne’ebé Estadu sai nu’udar parte.
Haree kurríkulu Adjuntu Prokuradór-Jerál Repúblika sira uluk nian.