Prokuradoria Repúblika Distritál Oecusse nu’udar órgaun Ministériu Públiku ne’ebé kompete atu dirije, kordena no superviziona atividade Ministériu Públiku iha Distritu Judisiál Oecusse, ne’ebé nia área hala’o knaar mak Rejiaun Administrativa Espesiál Oecusse.
Prokuradór Distritál, Mateus Nessi, mak dirije.
-
Haree kurríkulu hosi Mateus Nessi, Prokuradór Distritál Oecusse nian
Mateus Nessi moris iha Oecusse iha loron-11, fulan-marsu, tinan-1959. Hetan lisensiatura iha Direitu iha Universidade Kristen Satya Wacana iha Salatiga, Indonézia, iha tinan-1993. Durante nia estudu universitáriu, sai tiha nu’udar formadór ba Institutu ba Dezenvolvimentu Sosiál ba Universidade ne’e rasik, instituisaun ne’ebé nia servisu tiha mós hafoin ramata ninia kursu, inklui iha funsaun edukadór ba Sentru Formasaun Rekursu Umanu instituisaun ne’e nian iha Maubara, Liquiçá, hosi tinan-1995 to’o tinan-1999.
Iha tinan-1997, nia hola parte iha grupu fundadór sira Asosiasaun ba Direitu, Direitu Umanu no Justisa (HAK), aleinde sai fundadór mós ba Asosiasaun Tafen Kuan, iha Oecusse. Iha tinan-1999, nia servisu iha Misaun Nasoins Unidas iha Timor-Leste (akrónimu hosi inglés, UNAMET) to’o, iha fulan-jullu, tinan-2001, simu kargu nu’udar Administradór Sub-Distritu Passabe, Oecusse.
Tuirmai, hosi fulan-agosto 2001 to’o fulan-agosto 2008, nia hala’o servisu nu’udar Defensór Públiku. Iha fulan-setembru tinan hanesan, nia tama ba III Kursu Formasaun ba Majistradu no Defensór Públiku sira, ne’ebé hala’o hosi Sentru Formasaun Jurídika. Tama tiha iha Ministériu Públiku nu’udar Prokuradór Estajiáriu iha fulan-marsu, tinan-2010, hodi tuir mai simu tiha posse nu’udar Prokuradór Repúblika kolokadu iha Prokuradoria Distritál Dili.
Iha tinan 2014, nia sa’e ba kargu Prokuradór Distritál Suai nian, pozisaun ne’ebé okupa to’o simu nomeasaun nu’udar Prokuradór Distritál Oecusse, iha fulan-janeiru, tinan-2016.
KONTATU:
Prokuradoria Repúblika Distritál Oecusse
Rua Santa Rosa
Pante Makassar, Oecusse
Telefone: (+670) 253-0010
Fax: (+670) 253-0021