Aleinde marka prezensa iha sede distritu judisiál haat hotu, servisu sira Ministériu Públiku nian mós instala tiha iha munisípio tolu tan, tuir imajen iha leten ne’e hatudu
Iha sede distritu judisiál ida-idak eziste Prokuradoria Repúblika Distritál ida, mak nu’udar reprezentasaun Ministériu Públiku nian iha área jurisdisaun territoriál ne’ebá, ekiparadu ho tribunál distritál sira. Ne’e be, daudaun ne’e iha Timor-Leste funsiona Prokuradoria Repúblika Distritál haat: Prokuradoria Repúblika Distritál Dili, Prokuradoria Repúblika Distritál Baucau, Prokuradoria Repúblika Distritál Suai no Prokuradoria Repúblika Distritál Oecusse.
Prokuradoria Repúblika Distritál ida-idak Prokuradór Repúblika Distritál ida mak dirije, hetan nomeasaun ba komisaun servisu nian hosi Konsellu Superiór Ministériu Públiku ba períodu tinan tolu, hodi sai hanesan responsável ba diresaun, kordenasaun no fiskalizasaun ba atividade Ministériu Públiku iha distritu judisiál.
Konxiente ba nesesidade atu hakbesik justisa ba sidadaun hotu-hotu, Prokuradoria Jerál Repúblika harii tiha mós, no mantein iha funsionamentu, hahú hosi 2012, reprezentasaun sira iha munisípiu tolu seluk – Bobonaro (iha Distritu Judisiál Suai), Ermera (Dili) no Viqueque (Baucau) – hodi garante nia prezensa aleinde sede Distritu Judisiál sira, hodi nune’e promove direitu konstitusionál atu hetan asesu ba justisa. Haktuir jurisdisaun Prokuradoria Repúblika Distritál ne’ebé sira pertense ba, Prokuradoria Repúblika sira hosi Distritu Bobonaro, Ermera no Viqueque hetan infraestrutura, rekursu umanu no finanseiru espesifíku, nune’e iha kondisaun di’ak atu hala’o prestasaun servisu ba populasaun.