Prokuradoria Jerál Repúblika

Órgaun superiór Ministériu Públiiku nian, Prokuradoria Jerál Repúblika dirije hosi Prokuradór-Jeral Repúblika, ne’ebé hetan nomeasaun hosi Prezidente Repúblika ba mandatu ho durasaun tinan haat, no inklui mós Adjuntu sira Prokuradór-Jerál Repúblika, ne’ebé hetan nomeasaun hosi Prezidente Repúblika iha komisaun servisu nian ba períodu tinan tolu; ho tan Konsellu Superiór Ministériu Públiku no Servisu Apoiu Tékniku no Administrativu.

Iha Prokuradoria Jerál Repúblika nia okus funsiona Servisu Sentrál Kontensiozu Estadu, mak hanesan departamentu sentrál Ministériu Públiku nian ne’ebé responsável ba intervensaun no defeza ba interese sira Estadu nian iha área sivíl, administrativa, fiskál no kontas nian; no Gabinete Sentrál ba Kombate Korrupsaun no Kriminalidade Organizada, mak nu’udar área intervensaun Ministériu Públiku nian espesializadu iha investigasaun ba krime sira ne’ebé hala’o iha funsaun públika no krime koneksu sira, hanesan brankeamentu kapitál, aleinde intervém tan iha investigasaun ba krime kompleksu sira hanesan tráfiku droga, tráfiku umanu, kontrabandu no esplorasaun ilegál ba jogu sira, entre sira-seluk.

Tuirmai, bele haree kompeténsia sira Prokuradoria-Jerál Repúblika, tuir artigu 9.° Estatuto Ministériu Públiku nian:

a) Promove defeza ba legalidade demokrátika;

b) Nomeia, koloca, transfere, promove, exonera, apresia méritu profisionál, ezerse asaun dixiplinár no hala’o, enjerál, hahalok sira hotu ho natureza hanesan kona-ba majistradu sira Ministériu Públiku, ho exesaun ba Prokuradór-Jerál Repúblika;

c) Kordena, dirije no fiskaliza atividade Ministériu Públiku no hasai diretiva, orden no instrusaun sira ne’ebé atuasaun majistradu sira Ministériu Públiku nian tenke obedese bainhira hala’o sira-nia knaar;

d) Pronunsia kona-ba legalidade kontratu sira ne’ebé Estadu iha interese, bainhira nia paresér ezije hosi lei ka hetan solisitasaun hosi Governu;

e) Propoin ba Governu, liuhosi Ministru Justisa, providénsia lejislativa atu hasa’e Ministériu Públiku nia efisiénsia no aperfeisoamentu ba instituisaun judisiária sira;

f) Informa ba Parlamentu Nasionál no, liuhosi Ministru Justisa, ba Governu, kona-ba obskuridade, defisiénsia ka kontradisaun ruma hosi testu legál;

g) Fiskaliza superiormente atividade prosesuál hosi órgaun sira polísia kriminál;

h) Ezerse funsaun sira seluk ne’ebé lei fó.

KONTATU:

Prokuradoria Jerál Repúblika

Rua Colmera, s/n.°, C.P. n.° 34 – Dili, Timor-Leste

Telefone: (+670) 333-1165

Fax: (+670) 333-1147