Ministériu Públiku marka prezensa iha sede distritu judisiál haat hotu liuhosi Prokuradoria Repúblika Distritál sira Baucau, Dili, Suai no Oecusse nian, aleinde instala tiha ona servisu sira iha munisípiu tolu tan: Bobonaro, Ermera no Viqueque.

Iha sede ida-idak, ekipa sira kompostu hosi Prokuradór Repúblika no Ofisiál Justisa sira servisu iha ne’ebá hodi, aleinde atua iha prosesu sira, halo mós atendimentu ba sidadaun sira. Iha área kriminál, MP nu’udar titulár ba asaun penál, tanba ne’e nia mak iha knaar atu denunsia suspeitu sira krime nian ba Tribunál. Investigasaun iha área kriminál mós nu’udar funsaun ida MP nian – ne’ebé nia bele hala’o rasik ka delega ba órgaun sira polísia kriminál nian (PNTL, PSIK, KAK), maske akompaña no dirije nafatin. Nu’udar mós knaar Ministériu Públiku nian atu defende direitu sira labarik, idozu (katuak/ferik) no inkapás sira-nian, no mós defende direitu koletivu sira, ka sidadaun hotu-hotu nian, hanesan direitu ba saúde, edukasaun no meiu ambiente ne’ebé prezervadu, no seluseluk tan.  

Iha sede sira MP nian iha posibilidade atu hasai dúvida ka husu pergunta, hato’o keixa no denúnsia sira, no hetan informasaun kona-ba prosesu – haktuir termu lei sira-nian.