Prokuradór-Jerál Repúblika sei nomeia no ezonera hosi Prezidente Repúblika, hafoin rona tiha Governu, entre majistradu sira Ministériu Públiku nian no Juís-de-direitu sira ne’ebé ho kategoria la inferiór hosi 1ª klase, ba mandatu tinan haat, renovável, dala ida de’it, ba períodu hanesan.
Nia ezerse kompeténsia iha matéria diresaun, fiskalizasaun, reprezentasaun no ezekusaun (artigu 11.°, Estatutu Ministériu Públiku nian – EMP), sei tulun hosi adjuntu sira Prokuradór-Jerál nian, bele delega ba sira kompeténsia hirak ne’ebé nia haree katak apropriadu duni ba efisiénsia servisu no substitui, iha ninia auzénsia, hosi Adjuntu ne’ebé antigu liu (art.° 13.°, EMP).
Bainhira ezerse ninia funsaun, PJR sei hetan tulun mós hosi gabinete ida (art.° 11.°/3, EMP).
Dezde loron-15, fulan-abril, tinan-2013, kargu ne’e okupa hosi José da Costa Ximenes (haree kurríkulu), ne’ebé iha loron-28, fulan-abril, tinan-2017, simu posse ba ninia mandatu daruak.
Haree kurríkulu hosi Prokuradór-Jerál uluk sira-nian.