Boas-Vindas

Benvindu ba website foun Ministériu Públiku nian. Ami aprezenta, iha ne’e, informasaun kona-ba natureza, karakterístika, estrutura no kompeténsia hirak ne’ebé konstitusionalmente atribui ba órgaun administrasaun justisa nian ida ne’e, aleinde halo divulgasaun kona-ba atividade prinsipál hirak ne’ebé nia dezenvolve durante ne’e, ho objetivu atu serve ba sidadaun hotu ka ba sira ne’ebé, tanba knaar servisu nian, hakarak sukat ka simplesmente hakarak hatene kona-ba situasaun atuál Ministériu Públiku nian no ninia perkursu ne’ebé resente liu.

Tuir devér atu hato’o informasaun públika kona-ba dezempeñu funsaun sira Ministériu Públiku nian ba sidadaun sira no sosiedade enjerál, nu’udar instituisaun públika ida iha Estadu-de-direitu demokrátiku, kanál importante komunikasaun nian ida ne’e iha intensaun atu promove mós direitu fundamentál asesu ba justisa nian, no elabora tiha atu sai mós hanesan instrumentu ida tan ba divulgasaun informasaun jurídika.

Mandatu konstitusionál Ministériu Públiku nian inklui defeza ba direitu sidadaun sira-nian, ba legalidade demokrátika no ba interesse públiku. Responsabilidade ne’ebé mak ita iha perante ita-nia joven nasaun – ne’ebé mak foin lalais ne’e kompleta tinan-15 – boot tebtebes, nune’e mós, dezafiu sira ne’ebé mak ita konsege hakat-liu ona. Liu tiha faze sira estruturasaun no konsolidasaun, ita bele orgullu ho dalan ne’ebé mak ita liu to’o daudaun ne’e. Maibé, ita iha konxiénsia katak presiza atu hadi’a tan no avansa nafatin ho dispozisaun no korajen ba dalan dezenvolvimentu no afirmasaun justisa nian.

Durante perkursu ida ne’e, Ministériu Públiku sempre hetan apoiu esensiál hosi órgaun soberania sira, igreja no sosiedade sivil, nune’e mós sosiedade enjerál, no hosi parseiru organizmu internasionál no instituisaun konjénere hosi nasaun belum sira, espesiál hosi Komunidade País sira Lian Portugés nian (CPLP).

Tanba ne’e, ha’u hakarak hato’o mós agradesimentu ida, hodi Ministériu Públiku nia naran, hamutuk ho konvite atu ita tuir nafatin relasaun koperasaun nian ne’ebé proveitozu, nune’e, ha’u hein katak, website ida ne’e sai hanesan meius ida tan. Ami hein ita-boot sira-nia komentáriu, krítika no sujestaun.

     Dili, fulan-setembru, tinan-2017.

     Prokuradór-Jerál Repúblika

   José da Costa Ximenes