𝐏𝐉𝐑 𝐡𝐚𝐥𝐚’𝐨 𝐀𝐛𝐞𝐫𝐭𝐮𝐫𝐚 𝐅𝐨𝐫𝐦𝐚𝐬𝐚𝐮𝐧 𝐛𝐚 𝐏𝐍𝐓𝐋 𝐌𝐮𝐧𝐢𝐬𝐢𝐩𝐢𝐮 𝐄𝐫𝐦𝐞𝐫𝐚.

Ermera, loron-04, fulan-agostu, tinan-2026, Prokuardór Jerál Repúblika Dr. Nelson de Carvalho, hala’o abertura ba formasaun ho tema “ Protesaun Direitu Labarik iha Kontestu Lei Protesaun Labarik no Joven iha Perigu”, formasaun ne’e hala’o iha Komandu PNTL Munisipiu Ermera.

Iha diskursu abertura PJR hateten, Objetivu ba formasaun ida ne’e atu haforsa membru PNTL sira nia koñesimentu, kona-ba aplikasaun Lei nú 6/2023, atu responde ba Lei ida ne’e ho lalais efetivu no kordenadu hodi prevene situasaun perigu ne’ebé afeita ba labarik no foin-sae sira. Proteze labarik no foin-sae sira responsabel ema hotu nian. Polísia Nasionál iha kna’ar atu identifika situasaun risku proteze vitima sira no halo koordenasaun ho MP, servisu sosiál no entidade relevante sira.

Hau konvensibu katak, formasaun ida ne’e sei tulun partisipante sira nia kapasidade koñesimentu atu aplika lejislasaun iha pratika haburas intervensaun ne’ebé efetivu liu-liu respeita direitus umanus ba labrik sira nia interese.

Iha fatin hanesan, Komandante Munisípiu Ermera Superintendente, Ludgerio Picancio Madeira Lay, hato’o agradesimentu ba Prokuradoria Jerál Repúblika tanba hili PNTL Munisípiu Ermera hanesan fatin ba realizasaun formasaun ida ne’e.

Formasaun kontribui ba mellora kapasidade investigasaun membru PNTL sira, liuliu iha tratamentu ba kazu sira ne’ebé envolve labarik no foin-sa’e. Orgullu tanba oradór sira mai diretamente husi Ministériu Públiku, ne’ebé iha esperiénsia direta iha prosesu investigasaun ho nune’e fó oportunidade ba investigadór PNTL sira atu aprende no aproveita formasaun ida ne’e ho di’ak.

Formasaun ne’e aprezenta husi Adjuntu Prokuradór Jerál Repúblika Dr. jacinto Babo Soares, no Prokuradór Republika sira, Dr. Luís Hernani Rangel da Cruz, Dra. Remízia de Fatima da Silva, Dra. Benvinda da Costa do Rosário, Agradese mós ba UNICEF sai hanesan parseiru importante ida mai MP hodi bele reliza formsaun ida ne’e. (Média-PJR)