ππ‘πŽπŠπ”π‘π€πƒΓ“π‘-𝐉𝐄𝐑Á𝐋 π‘π„πΓšππ‹πˆπŠπ€ ππ€π‘π“πˆπ’πˆππ€ πˆπ‡π€ πŠπŽππ…π„π‘π„Μππ’πˆπ€ 𝐃𝐀-πŸπŸ” ππ‘πŽπŠπ”π‘π€πƒΓ“π‘-𝐉𝐄𝐑Á𝐋 π‚π‡πˆππ€β€“π€π’π„π€π (𝐂𝐀𝐏𝐆𝐂), πˆπ‡π€ ππ‘π”ππ„πˆ πƒπ€π‘π”π’π’π€π‹π€πŒ, πˆπ‡π€ π‹πŽπ‘πŽπ-𝟐𝟏 𝐍𝐎 𝟐𝟐, 𝐅𝐔𝐋𝐀𝐍-πŽπ”π“π”ππ‘π”, π“πˆππ€π-πŸπŸŽπŸπŸ”

ππ‘πŽπŠπ”π‘π€πƒΓ“π‘-𝐉𝐄𝐑Á𝐋 π‘π„πΓšππ‹πˆπŠπ€ ππ€π‘π“πˆπ’πˆππ€ πˆπ‡π€ πŠπŽππ…π„π‘π„Μππ’πˆπ€ 𝐃𝐀-πŸπŸ” ππ‘πŽπŠπ”π‘π€πƒΓ“π‘-𝐉𝐄𝐑Á𝐋 π‚π‡πˆππ€β€“π€π’π„π€π (𝐂𝐀𝐏𝐆𝐂), πˆπ‡π€ ππ‘π”ππ„πˆ πƒπ€π‘π”π’π’π€π‹π€πŒ, πˆπ‡π€ π‹πŽπ‘πŽπ-𝟐𝟏 𝐍𝐎 𝟐𝟐, 𝐅𝐔𝐋𝐀𝐍-πŽπ”π“π”ππ‘π”, π“πˆππ€π-πŸπŸŽπŸπŸ”

notΓ­sia

Iha loron-22, fulan-Outubru, tinan-2026, Dr. Nelson de Carvalho, ProkuradΓ³r-JerΓ‘l RepΓΊblika partisipa iha KonferΓ©nsia da-16 ProkuradΓ³r-JerΓ‘l China–ASEAN (CAPGC), ne’ebΓ© hala’o iha Brunei Darussalam.

KonferΓ©nsia ne’e hanesan fΓ³rum rejionΓ‘l importante ne’ebΓ© partisipa mΓ‘simu husi ProkuradΓ³r-JerΓ‘l membru Estadu ASEAN nian, ProkuradΓ³r-JerΓ‘l husi Supremo Povu Prokuradoria RepΓΊblika PopulΓ‘r Xina nian, Prokurador Rejiaun Administrativa EspesiΓ‘l Macau no Prokurador Hongkong, ho objetivu atu hametin kooperasaun jurΓ­dika no kombate krime transnasionΓ‘l sira.

Ho dezenvolvimentu teknolojia dijitΓ‘l ne’ebΓ© aumenta, krime hasoru labarik sira iha ambiente dijitΓ‘l sai dezafiu ne’ebΓ© presiza kolaborasaun internasionΓ‘l ne’ebΓ© forte liutΓ‘n. Ho tema konferΓ©nsia tinan ida-ne’e mak β€œProtesaun ba Labarik iha Era DijitΓ‘l: Harmonizasaun Kuadru JurΓ­diku no Kooperasaun InternasionΓ‘l.”

Iha konferΓ©nsia ne’e, ProkuradΓ³r-JerΓ‘l sira asina Deklarasaun Konjunta atu reafirma kompromisu hamutuk hodi proteje labarik sira iha era dijitΓ‘l, liuhusi hametin lejislasaun, hadi’a prosesu investigasaun no prosekusaun, fahe informasaun no koΓ±esimentu, no hametin kooperasaun transfronteirisa.

Partisipasaun Dr. Nelson de Carvalho, ProkuradΓ³r-JerΓ‘l RepΓΊblika, iha konferΓ©nsia ne’e reafirma kompromisu Prokuradoria-JerΓ‘l RepΓΊblika DemokrΓ‘tika Timor-Leste nian atu promove justisa, proteje labarik sira no hametin kooperasaun internasionΓ‘l hodi kombate krime transnasionΓ‘l sira. (MΓ©dia-PJR)