Tibar, loron-13, fulan-Agostu, tinan-2026, Ministériu Públiku, liuhusi Gabinete Sentrál Kombate Korrupsaun no Kriminalidade Organizada (GSKKKO), hamutuk ho Polísia Nasionál, liuhusi Servisu Intelejénsia Kriminál (PNSIC), no Autoridade Aduaneira, hala’o atividade destroesaun ba sigaru ilísitu hamutuk 2.259 karton, iha área Lixeira Tibar, Munisípiu Liquisa.
Prokuradór Jerál Repúblika (PJR), Dr. Nelson de Carvalho, hateten katak sigaru ilísitu ne’ebé destroé mak marka Marlboro no Manchester, ne’ebé sai evidénsia ba prosesu ho númeru 𝐍𝐔𝐂. 𝟎𝟐𝟔𝟔/𝟐𝟓.𝐏𝐍𝐒𝐈𝐂, 𝐍𝐔𝐂. 𝟎𝟐𝟎𝟕/𝟐𝟓.𝐏𝐍𝐒𝐈𝐂 𝐧𝐨 𝐍𝐔𝐂. 𝟎𝟐𝟓𝟓/𝟐𝟓.𝐏𝐍𝐒𝐈𝐂. Evidénsia sira-ne’e hetan apreensaun durante tinan 2025 no 2026, husi Autoridade Aduaneira no PNTL, tanba sigaru hirak ne’e tama mai Timor-Leste la tuir prosedimentu no laiha lisensa importasaun.
PJR Dr. Nelson de Carvalho esplika katak destroesaun ba evidénsia hirak ne’e hala’o tanba prosesu sira-ne’e hetan ona autorizasaun husi Tribunál. Sigaru hirak ne’e konsidera hanesan sasán ilísitu ne’ebé tama mai Timor-Leste liuhusi atividade kontrabandu, tanba importasaun la tuir prosedimentu no la iha lisensa legál.
Iha oportunidade ne’e hanesan, Adjunta-PJR Dra. Angelina J. Saldahna mós hateten katak. evidénsia hirak ne’e tama mai Timor-Leste la tuir prosedimentu legal. Nune’e, tuir dispozisaun Kódigu Penál, atividade hatama sasán mai liuhusi fronteira laiha lisensa no la tuir prosedimentu legal bele konsidera hanesan krime kontrabandu.
Enkuantu ne’e, Superintendente Assistente PNTL Mouzinho Correia akresenta katak PNTL, liuhusi Servisu Intelejénsia Kriminál, hamutuk ho Autoridade Aduaneira, hala’o ona operasaun apreensaun ba evidénsia hirak ne’e durante tinan rua ikus. Sigaru hirak ne’e mai husi nasaun 𝑲𝒂𝒎𝒃𝒐𝒅𝒋𝒂, 𝑽𝒊𝒆𝒕𝒏𝒂𝒎 𝒏𝒐 𝑺𝒊𝒏𝒈𝒂𝒑𝒖𝒓𝒂, no hetan apreensaun tanba la kumpre ho prosedimentu legál atu tama mai Timor-Leste.
Destroesaun ba sigaru ilísitu hirak ne’e sai parte husi esforsu institusaun sira atu kombate atividade kontrabandu, prevene entrada sasán ilísitu no asegura katak evidénsia ne’ebé hetan ona desizaun husi Tribunál bele trata tuir prosedimentu legál ne’ebé vigora iha Timor-Leste. (Média-MP)