Dili, Timor-Leste — Adjunta Prokuradór Jerál Repúblika Zélia Trindade iha Kinta (9/11/2017) simu vizita ida hosi membru polísia internasionál (InterPol) iha Eskritóriu PJR nian iha Kolmera, Dili hodi ko’alia kona-ba formasaun oioin ne’ebé nesesáriu iha área prevenensaun no investigasaun ba krime terrorizmu no krime sira seluk ho natureza organizadu, violentu no tranznasionál.
Ekipa INTERPOL ba Projetu Inter-Rejionál kona-ba Kontra Terrorizmu no Krime Tranznasionál Relasionadu sira iha Ázia Súl no Sudeste Ázia ne’e inklui Ofisiál espesialista rejionál Zikang YE no Jerente Projetu Formasaun nian Antonio Salgado.
Partisipa mós iha enkontru oras ida ho balu ne’e mak Diretór Polísia Sientífika Investigasaun Kriminál (PSIK) Vicente Fernandes e Brito no pontu fokál Interpol Timor-Leste, João Carlos Carion Courcinho.
Ekipa Interpol ne’e prezente ona iha Timor-Leste hosi 5 to’o 10 Novembru 2017 hodi halo enkontru ho autoridade sira pertinente iha luta kontra terrorizmu no krime organizadu kompleksu sira seluk.
Autoridade sira ne’ebé ekipa Interpol hasoru inklui Ministru Defeza no Seguransa José Agostinho Somotxo, Ministra Justisa Maria Ángela Carrascalão, Komandante Jerál PNTL Komisáriu Júlio Hornay, no selseluk tan.
Iha Timor-Leste Interpol servisu besik liu ho PSIK, ne’ebé tutela ba Ministériu Justisa, PNTL no Ministériu Públiku.
Tuir Diretór PSIK, ekipa Interpol nian mai iha-ne’e hodi diskuti ho parte sira relevante hodi organiza formasaun oioin kona-ba krimesiber, finansiamentu terrorizmu, no krime sira seluk ne’ebé relasiona ho forenze dijitál, investigasaun finanseira, no krime tranznasionál sira seluk.
Interpol Rejiaun Ázia Súl no Sudeste Ázia dezeña ona projetu ida hodi fó formasaun ba parte sira relavante kona-ba Kontra Terrorizmu no Krime Tranznasionál Relasionda iha rejiaun ne’e.
Projetu ne’ebé hanaran Scorpius ne’e sei hala’o hahú hoso Setembru 2017 to’o Fevereiru 2019 no orsamentu ba formasaun nian sei mai hosi Interpol no Governu Kanadá.
País sira iha rejiaun ne’e ne’ebé elejível atu partisipa mak Bangladesh, Índia, Indonézia, Malázia, Nepál, Pakistaun, Filipinas, Sri Lanka no Timor-Leste.
Tuir ajenda, formasaun ne’e sei fahe ba faze haat ne’ebé inklui Avaliasaun kona-ba nesesidade formasaun nian, programa inter-rejionál kona-ba aprendizajen bazeia ba websitiu no meius eletróniku, kapasidade poliamentu nian kona-ba kontra terrorizmu, semináriu tuir nesesidade nasionál no terrorizmu trans-fronteirisu oioin.
Diretór PSIK hatete katak Interpol kleur ona observa katak Timor-Leste iha poténsia bele sai nu’udar fatin ida di’ak ba terrorista hodi halo atividade kontra-bandu oioin hanesan tránzitu ema, arma, droga, kímika no materiál sira ne’ebé halo bomba, inklui rekruta ema sira iha rai-laran hodi sai membru ba organizasaun terrorista nian liuhosi média social no meius sira seluk.
Dr. Vicente Brito hanoin katak hodi halo kooperasaun ho Interpol, liuliu iha programa kapasitasaun oioin, Timor-Leste bele preparadu liu hodi responde ba krime organizadu no tranznasionál sira. (Média PJR/ Maria Lin)