Dili, Loron-13, fulan-Maiu, tinan-2025, Prezidente Repúblika Dr. José Ramos Horta, ofisialmente fó posse ba Dr. Nelson de Carvalho hodi asumi pasta nudár Prokuradór Jerál Repúblika ba mandatu periódu ida ho tempu durante tinan haat, tuir dekretu prezidensiál númeru 40/2025, 12-Maiu, ne’ebé publika iha Jornál Repúblika.
Iha diskursu Prokuradór Jerál Repúblika nian hateten, iha mandatu ne’e PJR fó prioridade liu ba rekursu umanu Ministériu Públiku nian, estatutu renumeratóriu ba majistradu no estatutu ba Ofisiál Justisa sira, no mós haree liu ba Krime Sibernétika ne’ebé mak agora dadaun espalla hodi buka meius oinsá atu bele antisipa.
Nune’e iha diskursu Prezidente Repúblika Dr. José Ramos Horta, hato’o kongratula ba Dr. Nelson de Carvalho ba kargu Prokuradór Jerál Repúblika no PR dehan, Dr. Nelson nia kareira riku ho esperénsia, tanba ne’e PR iha esperansa ne’ebé metin katak Dr. Nelson bele hasoru dezafiu sira ne’ebé MP hasoru ho determinasaun no matenek ne’ebé nia iha.(Media-PJR)