Dili-Diretór Autoridade Inspesaun no Fiskalizasaun ba Atividade Ekonómiku no Sanitária (AIFAESA), Abílio Oliveira Serano ho nia ekipa, segunda feira ne’e, (19/02/2018) hasoru malu ho Prokuradòr Jeràl Repùblika, (PJR), José da Costa Ximenes, iha nia knar fatin edífisiu Prokuradoria Jerál Repúblika Kolmera, hodi husu apoiu Ministériu Públiku (MP) nian, atu bele asegura servisu operasaun AIFAESA nian iha terenu,
“enkontru ida ne’e importante tebes entre Prokuradoria Jerál Repúblika ho AIFAESA nomós Polisia Nasionál Investigasaun Kriminál (PNSIK), ami nia enkontru ne’e atu hare oinsa AIFAESA bele servisu hamutuk ho Prokuradoria no PNSIK atu haree kona-ba atividade ekonómia ne’ebé ohin loron la’o hela iha ita nia país ida ne’e”, Adjunta Prokuradór Jerál Repúblika, Zélia Trindade haklaken lia hirak ne’e ba jornalista sira hafoin ramata enkontru refere.
Adjunta Prokuradór Jerál Repúblika ne’e afirma tan katak “AIFAESA hanesan autoridade ida ne’ebé mak iha nia kompetensia ba iha kontrola ka inspesaun ba atividade sira ne’ebé mak ohin loron la’o iha ita nia nasaun, liu-liu ba empresa sira ne’ebé mak la’o, ida ne’e importante tebes tanba dalabrak mak iha sira nia servisu sira sempre hasoru problemas iha terenu nune’e liga ho MP ninia kompetensia, hau here ne’e importante tebes”.
Adjunta reafirma tan katak “ami nia enkontru ida ne’e mós kolia kona-ba koordenasaun no kooperasaun entre AIFAESA ho MP bainhira iha terenu sira hetan problema ruma mak liga ho indísiu krimi, sira bele haruka kedan mai MP hamutuk ho PNSIK hodi MP halo prosesu kriminál ba oin, MP mós tau importansia ba iha assuntu ida ne’e tanba MP iha mós aturidade ida ne’ebé kontrola enjerál, liu-liu ba atividadae sira ne’ebé iha ita nia nasaun ne’e’.
MP nia kompetensia atu oinsa fó defesa ba direitu difuzaun koletivu nian, atu nune’e ba oin ami bele hare oinsa atu servisu hamutuk ho AIFAESA atu bele halo kontrolu ida ne’ebé mak diak ba atividade ekonomikus sira ne’ebé mak agora la’o barak iha ita nia rai laran, ami nia enkontru ne’e mós hanesan faze dahuluk ba Prokuradoria Jerál Repúblika halo ho AIFAESA atu ba futuru bele hametin liu tan kooperasaun servisu entre Prokuradoria Jerál Repúblika ho AIFAESA iha kontrolu ba atividade sira”, tenik hikas adjunta Prokuradór Jerál Repúblika
Iha fatin hanesan mos, tuir Diretór AIFAESA akresenta tan katak “enkontru ne’e AIFAESA rasik mak husu ba MP tanba servisu ne’ebé mak AIFAESA halo ne’e iha relasaun makas ho MP, AIFAESA halo operasaun sempre iha asaun administrativu no kriminál, tanba ne’e mak ami husu atu MP fó apoiu ba ami nia servisu kooperasaun, tanba ne’e mak ami mai hasoru direta Prokuradór Jerál Repúblika hodi simu motivasaun no husu apoiu makas hosi MP, hahu ohin ba oin MP bele haforsa liu tan operasaun ne’ebé AIFAESA halo, liu-liu iha materias kriminais nian, Abílio Oliveira Serano haklaken lia hirak ne’e hafoin remata enkontru entre Prokuradór Jerál Repúblika ho nia ekipa.
Ita rasik hatene katak, ohin loron ne’e interpretasaun oi-oin, tanba ema barak mak servisu la tuir nia kompetensia, tanba ne’e ami husu ba MP haré ba situasaun ne’e atu lebele kria tan konfuzaun ba operadores ekonomikus sira, mós labele kria konfuzaun ba populasaun no konsumidores sira, tanba ida ne’e mak ami mai husu tulun MP nia hodi haree ba interpretasaun ne’ebé ami halo bele lo’os liu tan no bele hetan klarifikasuan klean liu tan bainhira ami implementa lei sira ne’ebé mak regula atividade ekonómikus, tenik Diretór ne’e.
Entertantu tuir Diretór ne’e katak liu hosi hasoru malu ne’e hetan ona motivasaun lubuk ida hosi Prokuradór Jerál Repúblika, “ho enkontru ida ne’e ami fila ho motivasaun makaas liu no reforsa liu tan ami nia vontade atu halo ami nia servisu. (Media MP/Mariano da Conceição)