Dili, Sesta-feira, loron-05, fulan-Novembru, tinan-2021, Adjunta Prokuradór-Jerál Repúblika (APJR), Dra. Remizia de Fátima da Silva, marka tiha enkontru ho estrutura no majistradu sira Gabinete Sentrál Kombate Korrupsaun no Kriminalidade Organizada (GSKKKO) hodi hala’o avaliasaun ba progresu no difikuldade hirak ne’ebé durante ne’e GSKKKO sira enfrenta, enkontru ne’e realiza tiha iha sala reuniaun GSKKKO, Kolmera, Dili.
Iha reuniaun APJR nian ba dahuluk ho Majistradu no estrutura GSKKKO nian “ida-ne’e hanesan reuniaun dahuluk ho sira hafoin ha’u simu pose, tuir lolos atu realiza antes maibé la konsege tanba ha’u foin mai, ha’u-nia gabinete mós foin instala, hau seidauk hetan relatóriu hosi GSKKKO, ha’u hein relatóriu mai haree tiha foin halo planu, ida-ne’e hanesan inísiu ba ha’u-nia servisu hamutuk ho sira, entaun ha’u konvoka reuniaun ida-ne’e atu hamutuk ho sira hodi rona direktamente prokuradór sira ne’ebé kaer kazu hirak-ne’e, tuir kompeténsia ne’ebé PJR delega, katak ha’u haree kona-ba krime korrupsaun, investigasaun no kriminalidade organizada, iha nivél nasionál, nune’e mós atu buka hatene kona-ba, saída mak sira aprezenta, identifika kona-ba problema no difikuldade sira, sujestaun oinsá atu haree kona-ba kazu ida ne’ebé sei mai, hatete APJR.
Iha reuniaun ne’e, majistradu sira mós aprezenta kazu hirak ne’ebé nia prosesu la’o kleur, “majistradu sira aprezenta mai ha’u kona-ba kazu hirak ne’ebé prosesu la’o kleur, liuliu ba kazu hirak ne’ebé kompleksu, ida-ne’e sai atensaun ba públiku, tanba ne’e majistradu sira sujere atu bele haree asuntu ne’e, nune’e iha futuru bele kria ekipa ida hodi haree hamutuk, di’ak liu prokuradór titulár ida mak haree kazu ida-ne’e, hahú ba oin bele kria ekipa ba kazu boot no sai mós atensaun ba públiku hodi nune’e bele fó rezultadu ne’ebé di’ak.
Iha reuniaun ida-ne’e APJR mós kestiona kona-ba prosesu lao kleur, “Ha’u haree katak iha prosesu balun ne’ebé lao kleur, kona-ba ida-ne’e ha’u buka hatene tanba saída mak prosesu sira ne’e kleur, maibé ida-idak mak aprezenta ninia razaun, balun investigasaun sei la’o hela, ida-ne’e sai mós atensaun atu fó prioridade atu haree hamutuk hodi aselera prosesu hirak-ne’e, hanesan buat ida ne’ebé majistradu sira aprezenta mai depois buka solusaun iha parte ne’ebé kompeténsia delega mai ha’u, ha’u bele rezolve karik la konsege rezolve ha’u bele husu ba PJR atu bele deside tuir kompeténsia ne’ebé iha, (Media PJR).