Lisboa – Iha Kinta-feira, Loron-20, fulan-Setembru, tinan-2018, Ferramentu eletrónika sira ne’ebé dedika ba justisa iha Komunidade país sira lian portuguesa CPLP nian, tau hamutuk ka reune-hamutuk informasaun sira kona-ba enkontru Prokurador-Jerál CPLP nian ho mós dokumentu produzidu sira iha ámbitu enkontru refere, no reuniaun sira ne’ebé realiza tiha ona.
Projetu refere hanesan mós projetu konjuntu ida husi Prokuradoria-Jerál sira CPLP nian, ne’ebé permite hodi akompaña atividade hotu-hotu, no dezenvolve mós rede kolaborasaun nian ka kooperasaun Judisiáriu no Forum Ciberkrime nian. Iha portál refere disponibiliza mós lejizlasaun sira, hanesan konsaun sira, protokolu no memorandum entendementu ne’ebé asina ona.
Iha serimónia lansamentu portál refere, hetan partisipasaun mós hosi Prokuradór-Jeral Repúblika sira hanesan; Brasil, Cabo Verde, Guiné Bissau, Portugal no Timor-Leste, ho mós Vise Prokuradór-Jeral Repúblika Moçambique no reprezentante Prokuradór-Jeral Repúblika Angola, Diretora Departamentu Nasionál Investigasaun no Asaun Penál (DNIAP). Iha fatin hanesan partisipa mós husi Ministra Justisa Portuguesa no diplomata sira husi nasaun CPLP iha Lisboa.
Molok tama ba loron lansamentu portál CPLP ne’e, iha loron-19, fulan-setembru, tinan-2018, Prokuradór-Jeral Repúblika Timor-Leste hasoru malu uluk ho nia omólogu iha Prokuradoria-Jeral Repúblika Portuguesa hodi hala’o enkontru bilaterál entre instituisaun rua refere. Objetivu hosi enkontru ida-ne’e atu kontinua mantein no hametin servisu bilaterál entre Ministériu Públiku rai rua ne’e.
Durante enkontru ne’e, Prokuradora-Jeral Portuguesa manifesta nia prontidaun hodi apoiu nafatin Prokuradoria-Jeral Timor-Leste ba kualkér matéria ne’ebé Timor-Leste presiza asisténsia hodi kontinua mantein no hametin servisu bilaterál entre Ministériu Públiku rai rua ne’e nian. (Responsavel/Gab. PJR