Dili  ̶  Iha loron Kuarta (20/06/2018), Defensoria Públiku Federal Brazil (DPF) halo vizita kortezia ba Prokuradoria Jerál Repúblika Demokrátika Timor-Leste iha Colmera-Dili. Iha vizita ne’e, Defensór Públiku Federal Brazil, Carlos Eduardo Barbosa ho Prokuradór Jerál Repúblika, Josè da Costa Ximenes, koalia konaba servisu sira iha ambiente Prokuradoria Jerál Repúblika Timor-Leste ho Defensoria Públiku Federal Brazil nian.

Iha vizita ne’e, Prokuradór Jerál Repúblika Timor-Leste (PJR), José da Costa Ximenes esplika klean liu tan konaba ba funsionamentu Ministériu Públiku ba Defensór Públika Federal Brazil ho nia komitiva, iha sala reuniaun Konsellu Superior Ministériu Públiku (KSMP) Colmera, Dili, Timor-Leste.

Entretantu Prokuradór Jerál Repúblika Timor-Leste mos koalia konaba gabinete rua ne’ebé mak estabelese iha Prokuradoria Jerál Repúblika, mak hanesan, Gabinete kontensiozu Estadu, gabinete ne’e iha majistradu nain rua, no Gabinete Sentrál servisu Kombate Korrupsaun no Kriminalidade Organizada, estabelese iha fulan outubru tinan 2014, gabinete ne’e ho nia majistradu nain 4 hodi haree ba krime sira ne’ebé mak akontese iha ezersísiu funsaun públika nune’e mos ho kriminalidade organizada sira hanesan trafíku umanu, droga, brankeamentu kapitáis.

Iha fatin hanesan, Defensór Públiku Federal Brazil, Carlos  Eduardo Barbosa, iha nia intervensaun katak, “hau ho ami nia komitiva marka prezensa iha Timor-Leste tamba iha ajenda importante ligadu ho servisu tékniku ida hodi koalia konaba kooperasaun Timor-Leste ho Brazil, espesialmente iha area Defensoria Públiku Jerál, nune’e bele kolabora firme ho definitiva estruturasaun atu assesu justisa iha Timor-Leste, akredita katak laiha sistema justisa ne’ebé forte kuandu laiha mos defensoria ida ne’ebé forte hodi lori setór judisiáriu”, hateten Defensór Públika Federal Brazil.

Defensór Públika Federal Brazil ne’e konta uituan konaba sistema justisa iha ámbitu Defensoria ho Ministériu Públiku Federal Brazil nian, iha brazil felisita defensoria Públiku no Ministériu Públiku brazil iha area konveniente espesialmente iha area direitus umanus, servisu hakmatek iha ajenda saida deit, tan ne’e sistema direitu laos estadu nian maibé sai hanesan ponte ida hodi assesu ba justisa, hanesan mos iha área federalizasaun krime.

Aleinde ne’e, Defensor Públiku Jerál Timor-Leste, Sérgio de Jesus Hornai mos informa katak, obejetivu husi vizita ne’e atu hametin kooperasaun no haforsa institusionál konaba ejistensia Defensoria Públiku nian iha Timor-Leste ida ne’ebé loloos konta mós ho akordu ne’ebé harii tiha ona durante iha restaurasaun independensia iha tinan 2002 to’o 2005 no kontinua to’o 2015. Ida ne’e mak razaun sira servisu hamutuk ho Defensoria Públiku Federal Brazil, ho misaun kuadrus Defensoria Timor-Leste la haree ba tempu servisu nian tempu naruk ka badak, nafatin haforsa kuadru estrutura Defensoria Públiku iha país Timor-Leste, tenik Sérgio Hornai, iha vizita ne’e.

Sergio Hornai akresenta tan katak, “vizita ida ne’e hodi avalia projetu servisu kooperasaun durante servisu hamutuk trilateralmente Programa Nasões Unidus Dezelvolvimentu (PNUD) ho ajensia bilaterál kooperasaun Brazil no Defesoria Públiku Timor-Leste iha okaziaun ida ne’e importante ba ami katak ita bele harii servisu ida ne’ebé diak liu tan ho Defensoria Públiku Federal Brazil nomos nasaun sira CPLP nian. (Ekipa Media MP)