Dili, Loron-22, fulan-Setembru, tinan-2025, Prokuradór Jerál Repúblika Dr. Nelson de Carvalho, akompaña husi Adjunta-PJR Dra. Angelina J. Saldanha no Adjuntu-PJR Dr. Pascásio de R. Alves, fó posse ba Dra Lídia Soares nudár Koordenadora-Prokuradoria Repúblika Primeira Instánsia Dili. Serimónia ne’e hala’o iha Sala Reuniaun-PJR Kolmera.
Iha diskursu PJR hatete, sidadaun sira mak demanda ba servisu sira husi Prokuradoria Repúblika Primeira intánsia Dili, tanba ne’e, hein katak iha ezersísiu husi asaun penál, iha defeza direitu sira-nian no interrese menór sira-nian, inkapáz no auzente sira, iha faze legalidade Demokrátika nian no prmosaun husi komprimentu lei nian atusaun ida ne’ebé profisionál.
Nune’e PJR hatutan tan katak, asaun penál nia funsaun ida mak absorve liu tempu no rekursu sira ba Ministériu Públiku no ne’ebé iha parte boot ida hanesan avaliada ba ninia performanse, ézitu iha ninia diresaun depende ba, iha medida boot, husi kompeténsia téknika, kapasidade organizativa, métudu sira husi servisu adoptadu sira, dinamismu husi majistradu sira husi kapasidade interasaun nian no husi estreitamentu kooperasaun nian artikulasaun ho órgaun sira polísia kriminál nian ba servisu sira seluk relasiona ho MP nian. Nune’e mós antes remata PJR la husik liu hodi espresa rekoñesimentu ba servisu dezenpeña ona husi sesante Koordenadór- Prokuradoria Repúblika Primeira Instánsia Dili, Dr. Adérito Tilman.
Iha serimónia ne’e empossada hatete, objetivu prinsipál hanesan Koordenadora-PRPI Dili atu diriji, kordena, fiskaliza atividade sira ne’ebé iha PRPID, asegura reprezentasaun MP iha Tribunál Primeira Intánsia Dili, monitoriza movimentu servisu prosesuál ne’ebé pendente ho tempu ne’ebé mak konsidera exessivu. No antes remata Dra. Lídia hateten “ Kargu Ne’ebé hau simu todan, maibé la’ós dezafiu ida mai hau, pelu kontrariu motiva tebes hau hodi dezafia liutan hau an hodi servisu makas liutan ba instituisaun no rai doben Timor”. (Media-PJR)