DILI – Embaixadora Estadus Unidus Amerika (EUA) iha Timor-Leste Kathleen M. Fitzpatrick, halo enkontru ho Prokuradoria Jeral Repúblika, José da Costa Ximenes iha sala enkontru Gabinete Prokurador Jeral Repúblika Kolmera, Dili, iha loron Kuarta (6/06/2018) foin lailais ne’e.

Enkontru ne’e hodi halo avaliasaun ba apoiu formasaun  em termos de kapasitasaun, formasaun iha area krime organizadu nomós formasaun konaba viólensia doméstika hahú iha tinan 2010, apoiu formasaun ne’e mós laos deit iha rai-laran maibé formasaun mós iha rai-liur. Liu hosi apoiu EUA, Ministériu Públiku mós konsege haruka ona prokurador hamutuk ema nain 24 ba partisipa formasaun, ne’ebé hahú husi tinan 2010 to’o agora no Ministériu Públiku iha Prokuradores nain 32 ne’ebé hetan ona kapasitasaun maizomenus 50%.

PJR mós hato’o katak Ministériu Públiku iha mós area prioriedade hanesan; “halo formasaun ba krime organizadu, drogas, krime finanseiru, ciber krime, brankeamentu kapitais, rekuperasaun ativus, krime ambiental. Ho objetivu katak setor judisial sira bele identifika, investiga, prosesa krime ruma no halo kondenasaun ne’ebé importante, nomós defende ema inosente no públiku sira. ” Hateten PJR.

Formasaun durante ne’e mak hanesan krime finanseira komplexas, brankeamentu kapitais, fraude no korrupsaun iha setor públiku, formasaun rejional iha area siberkrime no prova elektrónika, formasaun krime ambientais, no formasaun sira seluk tan, hodi haree progressu ne’ebé mak atinji ona, liu husi apoiu ne’ebé Estadus Unidus Amerika oferese ba Ministériu Públiku.

Embaixadora EUA iha Timor-Leste Kathleen M. Fitzpatrick hato’o katak sira hakarak kontinua programa apoiu ba setór judisial no demokrasia iha Timor-Leste ne’ebé importante ba dezenvolvimentu demokratiku hodi hametin liu tan setór judisiál, estadu direitu, no hanesan iha area kombate korrupsaun no violensia domestika, ciber krime, krime internasional, trafiku umanu, hirak ne’e mesak interesante. Programa kona-ba estadu direitu buat ida ne’ebé mak EUA hamutuk ho ONU avalia hela, avaliasaun laos deit ba setór judisial maibé ba area hotu-hotu.

No iha semana hirak liu ba adjuntu prokurador EUA hanesan mós espesialista kona-ba krime ekonómiku no tráfiku umanu, no establese grupu ida hanaran grupu ajensia prinsipal, grupu ne’e mós halo reuniaun regularmente entre prokurador, investigador sosiedade sivil, defensor públiku, no pesikolójiku sira. (Media PJR/Maria Lin)