DILI – Ezekusaun Orsamentu Jerál Estadu 2017 iha Prokuradoria Jerál Repúblika (PJR) la’o ho susesu tebes. Konkluzaun ida ne’e mai hosi ekipa Diresaun Nasionál Kontabilidade Regulasaun Finanseira Ministériu Finansa nian, ne’ebé tun direta ba Diresaun Finansa no Orsamentu PJR nian hodi halo inpeksaun ba ezekusaun OJE iha iha kinta-feira (18/05/2017).
“Ohin ami mai halo inspeksaun ba Diresaun Finansa no Orsamentu PJR nain hodi observa direta sira nia prsosesu ezekusaun OJE ba tinan ida ne’e, liu hosi ami nia monitorizasaun hanesan aktividade ne’ebe mak hanesan tinan-tinan ami nia atu hare fila fali funsaun jestaun finansa públiku ne’ebé governu desentraliza ba ajénsia autonomi iha 2016 to’o agora”, hatete Eulitério Pereira Guterres, ne’ebé lidera ekipa Ministériu Finansa ne’e nian.
Tuir nia, inspeksaun ne’e hala’o ho objetivu atu kontrola no garante kualidade ezekusaun bazeia ba regulamentu sira ne’ebé vigora iha lei Orsamentu Jerál nian no, hahú hosi 2016, bainhira desentralizasaun ne’e hahú la’o, PJR ho Ministério Finansa sempre kolabora atu bele ajuda apoiu nafatin PJR nia servisu atu bele garante ezekusaun ho kualidade. Nune’e mós, liu hosi monitorizasaun refere ekipa Ministériu Finansa haree fali kona-ba implementasaun ba sujestaun sira ne’ebé sira hatoo iha tinan-2016.
“Tuir ami nia haree, PJR iha progresu ne’ebe bo’ot, hanesan ba iha ezekusaun Orsamentu Jerál Estadu no kontrola kualidade ezekusaun orsamento ho mós ba iha aréa akontabilidade nian”, tenik Guterres.
Iha tinan 2016, PJR hetan orsamentu anuál hamutuk $2,942,350.00, hahú hosi janeiru to’o dezembru tinan-2016 PJR nia ezekusaun ba orsamentu ne’e hamutuk 97% no, iha tinan-2017, Pakote Fiskál ne’ebé Governu atribui mai PJR ho montante $4,128,000.00. Relasiona ho ezekusaun ba orsamentu ne’e, Xefe Departamentu Finansa no Orsamentu PJR nian, Noémio da Silva, informa katak iha fulan-janeiru to’o maiu ezekusaun atinje ona 22%.
Da Silva salienta tan katak maske Diresaun Finansa no Orsamentu balun dezde momentu Governu desentraliza ezekusaun ba ajénsia autonomia hamutuk 32, iha tinan-2016 liu ba, Diresaun Finansa no Orsamentu PJR ho nia Departamentu sira serbisu makaas atu nune’e iha fulan-dezembru, tinan-2017, PJR bele atinji nia espetativa ezekusaun ba tinan-2017, mak 99%.
“Difikuldade sira ne’ebé Diresaun Finansa no Orsamentu hasoru iha momentu Governu desentraliza ezekusaun ba ajénsia autonomia hamutuk 32, inklui PJR ne’e, mak hanesan limitasaun rekursu umanu, nune’e mós sistema Freebalance ne’ebé mak parte diresaun finansa orsamentu utiliza nia velosidade la’o neneik, maibé ho problema sira ne’e Diresaun finansa no orsamentu esforsu hodi ezerse ninia funsaun ho di’ak atu nune’e bele atinje objetivu ne’ebé mak planeia ona tuir prosesu ezekusaun ne’ebé ke iha kualidade no tuir lei sira ne’ebé mak relasiona ho orsamentu nian”, nia informa.
Inpeksaun refere akompaña direta hosi Xefe Gabinete PJR, Carlito Sousa, Diretór Finansa no Orsamentu, Jacinto Romão, Xefe Departament Lojistika, Anabela Lessu, Xefe Departamentu Aprovizionamentu, Valente Nunes no Xefe Departamentu Finansa no Orsamentu, Noémio da Silva. (Média PJR)