Dili, Loron-06, fulan-Juñu, tinan-2025 Ministériu Públiku selebra aniversáriu ba dala-23, (ruanulu-resin-tolu), ho lema; “APRENDE HUSI PASADU HODI HARII FUTURU IDA DIAK LIU”. Selebrasaun ne’e hala’o iha Edifísiu Prokuradória Jerál Repúblika, Kolmera.
Iha serimónia aniversáriu nian ne’e Prokuradór Jerál Repúblika (PJR), Dr. Nelson de Carvalho, iha nia diskursu katak; “ita-boot sira-nia prezensa fó sentidu espesiál ba ami-nia komemorasaun aniversáriu MP nian ba dala-23 no ami agradese tebe-tebes, maibé aniversáriu labele konsidera de’it hanesan momentu festeja, importante mós atu konsidera nu’udár momentu ida hodi haree ba kotuk saida mak ita halo ona, liuliu biban ida ne’e sai hanesan pontu-de-partida ba futuru, hodi identifika dezafiu sira ne’ebé hatudu dalan atu halo aperfeisoamentu institusionál.
PJR akresenta liu-tan katak, ha’u iha konfiansa boot katak bele konta ho dedikasaun, empeñu, korazen no sentidu responsabilidade hosi ita-boot sira ida-idak, majistradu, ofisiál justisa no funsionáriu sira Ministériu Públiku nian, tuir nia nível responsabilidade nian, hodi emfrenta dezafiu sira prezente no future nian.
Ikus husi diskursu PJR hateten iha inísiu mandatu hanesan Prokuradór Jerál Repúblika ho esperansa boot katak ho ita-boot sira-nia tulun no servisu hamutuk ita sei avansa ba futuru ida ne’ebé ita hakarak no di’ak ba Ministériu Públiku no Justisa Timor-Leste nian.
Iha fatin hanesan mos, Prezidente Komisaun Organizadora hanesan mos Prokuradór Repúblika ida, Dr. Hernani Rangel mos fó agradese ba apoiu hotu hosi ekipa komisaun sira tanba liu hosi servisu hamutuk mak foin atinji ita nia objetivu. Nia informa tan katak, serimónia ne’e realiza tanba apoiu mos finanseiru hosi ofisiál justisa, SATA no Prokuradór Repúblika balun. (Media-PJR)