DILI – Komisáriu HIV/SIDA Daniel Marçal hala’o audénsia ho Prokuradór-Jerál Repúblika Dr. José da Costa Ximenes, iha Gabinete Prokuradoria Jeral Repúblika, Kolmera, iha loron Kuarta (3/10/2018) foin lalais ne’e.
Ajenda ba enkontru ne’e ko’alia kona-ba moras HIV/SIDA ne’ebé oras ne’e daudaun afeta hela funsionáriu balun, no ida seluk tan mak; iha funsionariu balun mós komete falsifikasaun dokumentu.
Iha fulan-Janeiru to’o fulan-Jullu, komisaun HIV/SIDA rejista ona moras HIV/SIDA hamutuk ema nain 798, no iha balun hetan ona moras, maibé ladauk rejistu.
Iha okaziaun ida-ne’e, komisáriu mós relata moras HIV/SIDA agora komesa hada’et ba funsionáriu sira, situasaun ida-ne’e sai risku tamba ne’e presiza fahe informasaun ba maluk sira hodi prevene, hateten Komisáriu.
Komisáriu HIV/SIDA Daniel Marçal mós relata katak Komisaun Nasional Kombate HIV/SIDA detekta funsionáriu kontratadu balun halo falsifikasaun dokumentus no komisaun direta hapara funsionáriu kontratadu sira ne’e, haree ba situasaun ida-ne’e komisaun hakat mai Ministériu Públiku hodi hetan asistensia justisa ba situasaun ida ne’e.
Iha fatin hanesan Prokuradór-Jerál Repúblika Dr. José da Costa Ximenes hatutan katak situasaun ne’ebé infrenta hosi komisaun, jeralmente kuandu iha funsionáriu kontratadu balun durante hala’o servisu la hatudu prestasaun servisu, la iha dezempeñu, la iha vontade servisu, instituisaun relevante iha dever la ekstende kontratu, maibé futuru kuandu iha reklamasaun ka inpugna hosi kontratadu sira, Ministériu Públiku liu hosi gabinete kontensiozu sei reprezenta komisaun hodi hatan iha tribunal, tenik PJR. (Media PJR)