Díli-Prokuradór Distritál Díli (PDD), Dr. Jacinto Babo sai oradór ba diskusaun ne’ebé realiza hosi Sentru Estudu ba Dame no Dezenvolvimentu (CEPAD) ho tema importante “Hakbit Koñesementu Setór Públiku ba Asaun Hasoru Korrupsaun”. Diskusaun ne’e hala’o durante loron rua, hahú hosi loron-29 to’o 30, fulan-Janeiru, tinan-2019, iha Ministériu Agrikultura no Peskas, Comoro.

Iha diskusaun ne’e, Dr. Jacinto Babo hateten katak “ha’u-nia presenza iha ne’e, atu fahe informasaun kona-ba lei sira, liuliu artigu sira iha kódigu penál nian, tanba dalaruma ita la iha koñesimentu kona-ba artigu sira ne’e, nune’e, bele halo ita sai fali arguidu no vítima iha prosesu ruma”.

Prokuradór Distritál Dili ne’e afirma tan katak “baibain Ministériu Públiku (MP) haree liu ba iha represaun, investigasaun no akuzasaun, ikusmai ami haree no estuda katak tenke halo prevensaun, tanba ema la iha koñesementu ba ita nia lei sira, entaun krimi sira liga ba ezérsisiu funsaun públika nian aumenta, bainhira ita halo ona prevensaun no dezaminasaun ba lei sira, entaun bele hamenus tiha krime ida ne’e. Treinamentu ida-ne’e importante tebetebes tanba bele fó benefisiu ba ita no ba ita-nia estadu,  nune’e, ita bele hahú ona muda buat balun maske la barak”.

Iha fatin hanesan, Diretór Ezekutivu CEPAD,  João Boavida, esklarese katak “ami-nia programa sensibilizasaun, edukasuan no prevensaun ne’e foku de’it iha funsionalizmu públika, bainhira ita nu’udár servidór públiku iha nivél xefia dala barak ita uza sala ita-nia kargu no podér no tanba de’it la iha koñesimentu kona-ba lei refere, nune’e ikusmai bele hamosu korrupsaun iha setór públiku no dala barak ema sira ne’e la iha intensaun ruma atu na’ok, haree ba situasaun iha leten nune’e mak ami aposta atu halo sensibilizasaun ida ne’e hodi sensibiliza  sira-nia hanoin kona-ba Korrupsaun, Kolusaun no Nepotízmu”.

Diretór CEPAD akresenta tan katak “korrupsaun estraga estadu nia kapasidade hodi la konsege fó protesaun direitu ne’ebé sidadaun iha, tanba ne’e husu ba servidór sira atu kuidadu ba sasán estadu nian, uza mós tuir fiar ne’ebé povu fó ba imi hotu, tanba sidadaun sira mak fó konfiansa ba ita hodi asumi kargu ne’e hodi haree ba interese koletivu nian”.

Partisipante iha diskusaun ne’e mak Diretór Nasionál, Xefe Departamentu hosi Ministériu hitu ne’ebé hanaran-an nu’udar Grupu Konsultativu Nasionál (GKN) kompostu hosi; MP, MAP, KAK, PN, PDHJ, MS no ME no prezidente ba grupu ne’e mak atuál Diretór CEPAD nian. (Media MP)