Dili-Konsellu Superiór Ministériu Públiku (KSMP) liuhosi reuniaun KSMP nian hodi eskolla fali kandidatu ba Adjuntu Prokuradór-Jerál Repúblika nian, kandidatu nain tolu ne’e nia naran haruka ona ba Prezidente Repúblika (PR), Francisco Guterres Lu-Olo, hein de’it desizaun hosi PR nian kona-ba nomeasaun Adjuntu-PJR foun.

“Enkontru ne’ebé ami halo hanesan enkontru mensál, enkontru ida-ne’e aproveita informa ba PR kona-ba komisaun servisu Adjunta Prokuradór-Jerál Repúblika nian ne’ebé ramata ona iha loron-28, fulan-Setembru, tinan-2018, entaun ami mai hodi hato’o ami-nia agradesimentu ba PR, tanba tinan ida ami servisu hamutuk ho PR” Prokuradór-Jerál Repúblika (PJR), Dr. José da Costa, haklaken lia hirak ne’e ba jornalista sira hafoin ramata reuniaun mensál ho PR iha Palásiu Prezidente Bairru-Pite, sesta (05/10/2018).

Iha okaizaun ne’e, Prokuradór-Jerál Repúblika informa mós kona-ba nia viajen ba Portugal, “informa mós ba PR kona-ba ha’u-nia viajen ba Portugal hodi partisipa iha enkontru bilaterál dahuluk ho Prokuradóra-Jerál Repúblika Portugal, iha enkontru ne’e ami diskuti kona-ba oinsá atu reforsa nafatin ami-nia kooperasaun servisu entre PJR Timor-Leste ho PJR Portugal, tenik Dr. José da Costa Ximenes.

Nia realsa tan katak “ami mós ko’alia kona-ba ideia ne’ebé agora Timor-Leste dezenvolve dadaun iha área formasuan nian, ami iha servisu espesializadu kona-ba Kontesiozu Estadu tanba fiskais no kontus ida ne’ebé foun, entaun iha enkontru ne’e ami husu ba PJR Portugal oinsá bele apoiu iha nivél reforsa kuadru formasaun ba sira ne’e.

Entretantu iha viajen estranjeiru ne’e, PJR mós partisipa iha lansamentu ofisiál ida kona-ba enkontru PJR-CPLP “ha’u partisipa mós lansamentu ofisiál ba enkontru PJR-CPLP nian ne’ebé hala’o iha Lisboa no ikusliu tuir mós konferênsia internasionál ida ne’ebé ho titlu kombate korrupsaun no prespetiva ba futuru, nia tenik.

Prokuradór-Jerál Repúblika informa ba Prezidente Repúblika mós kona-ba, inspesaun ba kuadru Majistradu sira katak, “ami aprezenta ba PR, agora dadaun ne’e KSMP prepara hela inspesaun ba ami-nia kuadru sira, ofisiál justisa ba kargu sekretária, nune’e mós inspesaun la’ós halo de’it ba Majistradu sira maibé mós ba ofisiál justisa sira iha nivél promosaun, progresaun ba funsionáriu públiku sira ne’ebé servisu iha Prokuradoria-Jerál Repúblika, tenik hikas PJR

Prokuradór-Jerál Repúblika ho Eis-Adjunta PJR nian informa mós ba Prezidente Repúblika kona-ba kazu ne’ebé akontese iha Dolok-oan Area Kristu Rei “ami informa mós ba PR kona-ba kazu konkretu balun ne’ebé sai hanesan preokupasaun ba MP, hanesan kazu ne’ebé akontese iha Dolok-oan, arguidu nain lima ne’ebé halo violasaun seksuál hasoru vítima no ikus mai oho mate lori ba soe hela iha Subaun no sira agora iha ona prizaun preventive. informa PJR

Iha reuniaun refere Nai-Ulun Ministériu Públiku, informa mós kona-ba kazu Omesidu ne’ebé komete husi oknum F-FDTL iha Munisipiu Baucau, “ha’u informa mós ba PR kona-ba membru F-FDTL ida ne’ebé oho ninia ferik-oan iha Baucau no agora membru F-FDTL ne’e detein ona iha prizaun preventiva, ida ne’e mak kazu balun ne’ebé mak ami haree hela hodi informa ba PR, dehan nia.

Prezidente Repúblika Timor-Leste, rona tiha informasaun hirak ne’e, PR husu ba MP atu mantein nafatin servisu no hatudu nafatin produtividade servisu MP nian hodi kombate krime ne’ebé agora buras iha ita nia nasaun, (Media MP).