DILI – Prokuradór-Jerál Repúblika (PJR), José da Costa Ximenes, iha segunda-feira (29/05/2017) ba dahuluk hala’o enkontru ho Prezidente Konsellu Imprensa (KI), Virgílio Guterres, hodi diskute oinsá atu kria koperasaun entre instituisaun rua refere iha futuru.
“Ida ne’e hanesan enkontru inisiál ida, ami fahe informasaun ba malu no diskute kona-ba posibilidade atu hala’o formasaun hamutuk iha futuru, ami mós sei haree oinsa para bele formaliza ami nia koperasaun”, tenik PJR hafoin enkontru ne’e remata, iha edifísiu Prokuradoria Jerál Repúblika, Kolmera.
Alende ne’e, Prezidente Konsellu Imprensa hatutan katak enkontru ida ne’e inklui ba iha programa komunikasaun ne’ebé Konsellu Imprensa halo ho instituisaun Estadu sira nian atu buka posibilidade koperasaun hodi troka informasaun. Tuir nia, objetivu komún ne’e mak buka oinsá atu hamutuk garante liberdade imprensa, liberdade espresaun, no hadia kualidade informasaun ne’ebé media ka imprensa fó sai ba públiku.
“Instituisaun ida-idak iha sira nia kompeténsia no papél iha sosiedade, dala barak mós kompeténsia sira ne’e ita hasoru malu imprensa mós hakarak hato’o ka públika informasaun loloos no instituisaun sira ne’e mak sai hanesan fonte de informasaun. Iha Ministériu Públiku ha’u nia hanoin prosesu judisiál hahú to’o tribunál dala ruma mós jornalista sira presiza komprende ho entende prosesu sira ne’e, atu bele fó informasaun ne’ebé loloos ba públiku no evita situasaun ruma katak tribunál seidauk fó sala ema, ita media fó sala uluk ona ema ida (trial by the press)”, dehan Prezidente KI.
Virgílio Guterres informa tan katak iha tempu badak KI sei hahú realiza estájiu ba jornalista sira tuir Lei Komunikasaun haruka, no hosi nia parte buka hela oinsá atu iha koperasaun ho MP hodi bele mós hola parte formasaun ne’e atu esplika ba jornalista sira kona-ba prosedimentu justisa ninian, hosi kedan keixa, investigasaun molok atu entrega ba tribunál, no KI mós bele envolve iha formasaun majistradu sira atu informa kona-ba papél media nian. (Média PJR)