DÍLI – Adjunta Prokuradór-Jerál Repúblika Dra. Zélia Trindade hamutuk ho ekipa tékniku Administrasaun Jerál Ministériu Públiku aprezenta relatóriu kona-ba ezekusaun Orsamentu Jerál Estadu tinan-2017 no mós hato’o Planu Orsamentu Jerál Estadu nian tinan-2018 iha komisaun A, Asuntu Konstituisionais no Justisa, iha loron-sexta (17/08/18) foin lalais ne’e.

Reuniaun ida-ne’e prezidi hosi Prezidente Komisaun A Dra.Carmelita Caetano Moniz, no hetan asisti husi Deputadu kada bankada ida-idak hanesan CNRT, PLP, Fretilin, Kunto, UDT   no PD.

Uluknanain Adjunta Prokuradór-Jerál Repúblika Dra. Zélia Trindade lori Prokuradór-Jerál Repúblika Dr. José da Costa Ximenes nian naran hato’o agradesimentu no kumprimentus ba deputadu sira hotu.

Aprezentasaun ne’e hahú husi kapasidade ezekusaun Ministériu Públiku tinan-2017 bazeia ba kategória orsamentu 4 ne’ebé alokadu mak hanesan Saláriu no vensimentu, Bens no servisu, Kapitál menór, no Kapitál dezenvolvimentu, grand total ezekusaun tinan 2017 Ministériu Públiku husi alokasaun orsamentu anuál ba kategória 4 mak $ 4.127.926,00, ezekuta $ 3.127.589,08, restu fó fila ba kaixa $ 1.000.336, 92, persentajen ezekusaun 76%, no persentajen restu ne’ebé fó fila 24%. Kapasidade ezekusaun ida-ne’e mós la sés husi buat lubun balun ne’ebé Ministériu enfrenta durante tinan-2017 mak hanesan, kategória saláriu no vensimentu Ministériu prevé orsamentu ba saláriu majistradu husi janeiru to’o dezembru tuir alterasaun lei remuneratóriu No.16/2017,  maibé implementasaun ne’e vigór iha loron-4 fulan outubru tinan-2017, kategória Bens no kapitál menór Ministériu ezekuta la atinji tamba mudansa estrutura servisu administrasaun, ikusliu kapitál dezenvovilmentu Ministériu tuir loloos hetan alokasaun $ 2.042,86 hodi selu retensaun moru iha Prokuradoria Distrital Oe-cusse maibé governu aloka orsamentu mai Ministériu $ 9.926,00, restu orsamentu hafoin selu retensaun moru PDO servisu administrasaun jeral esforsu uza restu orsamentu loke konkursu ba moru PDS dala 7 maibé la hetan konkorrente. Husi razaun lubun ida-ne’e mak difikulta Ministériu nia ezekusaun orsamentu iha tinan-2017, tenik Adjunta Prokuradór-Jerál Repúblika.

Tuirmai Adjunta Prokuradór-Jerál Repúblika mós hato’o planu Orsamentu Jeral Estadu tinan-2018 Ministériu Públiku ne’ebé hetan alokasaun ba kategoria 3, hanesan Rúbrika Saláriu no Vensimentu, Bens no Servisu, no Kapital Desenvolvimentu ho total $ 2.593.628,00, Adjunta mós la haluha informa katak Ministériu esforsu jere orsamentu ne’ebé alokadu hodi atende to’o tinan-2018 ramata, no Ministéiru laiha tusan ba servisu balun ne’ebé mak prejudika orsamentu Ministériu nian.

Molok sesaun apresentasaun ramata Ministériu Públiku taka ho konkluzaun planu espetativa tinan 4 ba oin mak hanesan; planu halo alargamentu edifísiu Ministériu iha Munisípiu 3 hanesan Lospalos, Manufahi no Likisa maibé prioridade uluk maka Lospalos no Manufahi.

Haree ba planu alargamentu ida-ne’e sei iha impaktu mós ba nesesidade sira seluk hanesan presiza aumenta rekursu humanu liuhusi rekrutamentu, aumenta fasilidade no mós kria kondisaun ne’ebé di’ak atu nune’e komunidade fasil atu hakbesik an ba justisa liuliu área ne’ebé mak persentajen krime sa’e maka’as.

Akompaña Adjunta Prokuradóra Jerál Repúblika iha audénsia Orsamentu Jerál Estadu tinan-2018 mak hanesan Xefi Gabinete PJR, Diretóra Jerál, Diretór Finansas no Orsamentu, Diretór Administrasaun no Rekursu Humanu, Reprezentante OJ KSMP, no Xefi IT. (Media PJR)