DILI – Adjunta Prokuradór-Jerál Repúblika (PJR), Zélia Trindade, sai hanesan oradór ba Semináriu Nasionál ho tema “Pás, Justisa no Toleránsia Atu Konsolida Independénsia Nasionál”, ne’ebé realiza hosi Gabinete Primeira Dama, Isabel Ferreira, iha Sentru Konvensaun Dili, kinta feira (20/04/2017).
Iha oportunidade ne’e, APJR hatoo nia sente priviléjiu boot tanba bele partisipa iha inisiativa di’ak ne’e hodi prepara sidadaun timoroan sira nia partisipasaun iha eleisaun parlamentar tuir mai, ne’ebé sei hala’o iha fulan-jullu, no fó esplikasaun uituan kona-ba lei balun relasiona ho prosesu eleitorál, inklui ho Rejime Jurídiku kona-ba Finansiamentu Partidu Polítiku sira nian (Lei n.° 06/2006, hosi loron-16, fulan-abril).
“Partidu polítiku sira bainhira tama ona ba eleisaun sira presiza osan, no lei iha hodi regula didi’ak partidu polítiku sira nia reseita mai hosi ne’ebé, reseita própriu, reseita proveniente hosi ne’ebé, partidu polítiku sira tenke hatene lei ne’e hodi la’o tuir, la’e bele hetan sansaun, bele tama ona pena prizaun ka pena multa”, dehan APJR.
APJR hateten tan katak iha Lei kona-ba Órgaun Administrasaun Eleitorál sira (Lei n. °5/2006, hosi loron-28, fulan-dezembru), altera tiha ho Lei n.° 7/2016, hosi loron-8, fulan-juñu, no halo mudansa balun no iha aspetu balun iha frakeza tanba kria konfuzaun ka la-koalia klaru iha implementasaun liu-liu ba Komisaun Nasionál Eleisaun sira nian (akrónimu hosi portugés, CNE)
“Altura ne’ebá ita iha komisáriu na’in 15, agora tuun ba iha hitu, ida ne’e di’ak maibé iha buat seluk hanesan Lei sira seluk ne’ebé ko’alia kona-ba remunerasaun la ko’alia klaru, entaun buat sira ne’e la’o sei afeta, prejuízu, la’ós prejuízu tanba iha intensaun ka konsiente para halo kontrária ho lei maibé, lei mós la ko’alia klaru oinsá ema atu halo, ida ne’e maka ita tenke buka hadi’a, iha segundu alterasaun ne’e ita espera katak lei ne’e perfeitamente ita implementa ho di’ak no tuir ema hotu nia esperansa”, tenik APJR.
APJR esklarese tan katak lei importante ida ne’ebé presiza ema hotu hatene nia elementu sira mak Lei kona-ba Resenseamentu Eleitorál nian (Lei n.° 6/2016 hosi loron-25, fulan-maiu), ne’ebé estabelese oinsá mak prosesu ba rejistu ba eleitór sira tenke hala’o, no kabe ba Servisu Tékniku ba Administrasaun Eleitorál (STAE) no CNE atu haree prosesu ida ne’e hodi ema hotu bele partisipa, ema hotu bele rejistu no halo kontrola atu nune’e labele mosu falsifikasaun dukumentus iha eleisaun ida tuir mai ne’e.
Semináriu ne’e hetan partisipasaun hosi reprezentante ba órgaun administrasaun eleitorál sira (STAE no CNE), partidu polítiku sira, sosiedade sivil, instituisaun akadémiku no estudante sira hosi UNTL, UNPAZ, UNDIL no UNITAL. (Media PJR)