DILI – Prokuradór-Jerál Repúblika (PJR), José da Costa Ximenes, kuarta-feira (21/09/2017) foin lalais asina memorandu-de-entendimentu ida ho ONG Sentru Estudu ba Paz no Dezenvolvimentu (akrónimu hosi lian Portugés, CEPAD). Liu hosi dokumentu ne’e, ne’ebé asina hosi PJR ho Diretór Ezekutivu CEPAD, João Boavida, atu haforsa kolaborasaun entre instituisaun rua ne’e iha área prevensaun, liu-liu ba krime korrupsaun.
Iha serimónia asina akordu ne’e, ne’ebé realiza iha sala reuniaun Konsellu Superior Ministériu Públiku, PJR hato’o katak papél prinsipál hosi Ministériu Públiku nian mak represaun, desde tinan-2009 hahú ho servisu espesializadu ho prokuradór balun até estabelesimentu Gabinete Kombate Korrupsaun, iha tinan-2014, nune’e wainhira formaliza koperasaun ho CEPAD iha área prevensaun nian, nia deklara katak sente kontente tanba se mesak hala’o represaun de’it sei labele redús númeru kazu korupsaun iha nível ne’ebé ita haree buras dadaun.
“Objetivu prinsipál hosi asina memorandu entendimentu ida ne’e haree liu ba iha área prevensaun, liu-liu halo hanesan semináriu, formasaun entermus kapasitasaun, fahe informasaun ba komunidade, sensibilizasaun ba komunidade”, dehan PJR.
Iha fatin hanesan, diretór ezekutivu CEPAD hato’o katak nia kontente tebes no onra boot ba CEPAD no ekipa tomak atu asina hamutuk memorandu-de-entendimentu ida ne’e, atu bele hamutuk ho Prokuradoria Jerál Repúblika hametin servisu ne’ebé durante ne’e CEPAD hala’o. João Boavida esplika katak CEPAD hahú hala’o servisu iha tinan-2007 no, desde tempu ne’ebá, PJR kontribui ba CEPAD nia servisu hodi hakbi’it koñesimentu área prevensaun korrupsaun nian, rezulta sira konsege prodús pakote edukasaun sívika ne’ebé permanente liu hosi rádiu, televizaun, brosura, módulu treinamentu, diskusaun, no diálogu interaktivu. (Media PJR/ Maria Lin)