Dili-Iha Sesta, loron-07, fulan-Dezembru, tinan-2018, Prokuradór-Jerál Repúblika (PJR), Dr. José da Costa Ximenes fó-pose ba Dr. Jacinto Babo Soares nu’udar Prokuradór Distritál Dili (PDD), no Dra. Remízia de Fátima da Silva nu’udar Prokuradora Distritál Baucau (PDB). Seremónia tomada-de-pose ne’e halao iha sala reuniaun Prokuradoria-Jerál Repúblika, Colmera.
Iha seremónia Tomada-de-pose ne’e, Prokuradór-Jerál Repúblika, Dr. José da Costa Ximenes hato’o nia votu susesu ba emposadu na’in-rua “ha’u hakarak dirije ha’u-nia felisitasaun no ha’u-nia votu susesu ba dignísimu Majistradu emposadu sira, Dra. Remízia de Fátima da Silva no Dr. Jacinto Babo Soares, ne’ebé hetan konfiansa hodi asume kargu ne’ebé a’as liu iha Prokuradoria Repúblika Distritál rua ne’e.
Iha fatin hanesan Prokuradór-Jerál Repúblika afirma katak, “kargu Prokuradór Repúblika Distritál hala’o iha komisaun servisu nian, signifika katak atu hetan kargu ida-ne’e sei pondera kritériu espesífiku sira ne’ebé ultrapasa kritériu sira ba progresaun iha karreira.
Prokuradór-Jerál Repúblika reafirma tan katak “Nu’udar naturál sé mak hetan kna’ar atu hala’o atividade sira diresaun no koordenasaun nian tenke hetan avaliasaun ba sira-nia rezultadu jestaun nian, ne’e signifika katak bainhira hala’o kargu nu’udar Prokuradór Repúblika Distritál sei hetan avaliasaun beibeik hosi Konsellu Superiór Ministériu Públiku (KSMP) haktuir ninia kompeténsia.
Prokuradór-Jerál Repúblika nu’udar mós Prezidente KSMP nian fó konfiansa boot ba emposadu na’in-rua ne’e no hatete katak “Ha’u la iha dúvida ba imi tanba ha’u hatene ona katak imi na’in-rua merese duni hetan konfiansa hosi KSMP, no sei fó imi-nia kbiit tomak hodi hala’o servisu ba sidadaun sira ne’ebé dere odamatan Ministériu Públiku (MP) nian hodi buka justisa.
Iha sorin seluk, hafoin simu tiha pose, emposadu Dr. Jacinto Babo Soares hatete katak,“ hanesan Prokuradór Distritál ka sai nu’udar Xefe, ita sempre iha planu, no planu ne’e rasik la sees husi saida mak kolega sira halo tiha ona, ida ne’ebé di’ak ita kontinua nafatin no hirak-ne’ebé iha faillansu ruma ita sei buka maneira oinsá atu hadi’a fali”.
Iha biban ne’e mós, emposada Dra. Remízia de Fátima da Silva hatete katak “ha’u buka hatene kona-ba oinsá prosesu investigasun iha terrenu no sei kontinua servisu hamutuk no halo kolaborasaun di’ak ho Polísia sira iha Munisipiu Baucau hodi haree nia lala’ok ne’e oinsá, no mós sei halo planu atu hadi’a buat ne’ebé seidauk di’ak, ida ne’ebé mak di’ak ona ita sei mantein nafatin”. (Media MP)