DILI – Prokuradór-Jerál Repúblika (PJR), José da Costa Ximenes, kuarta-feira (20/09/2017) foin lalais ne’e, fó tomada-de-posse ba Inspektora Ministériu Públiku (MP), Angelina Saldanha, ne’ebé sai nu’udar majistradu timoroan ba dahuluk atu assume knaar importante ida ne’e. Iha okaziaun hanesan, simu posse mós Prokuradór Distritál Dili, Alfonso Lopes, ho Prokuradora Distritál Baucau, Ivónia Maria Guterres.
Iha ninia dirkurso, PJR hato’o uituan kona-ba susesu sira ne’ebeé durante ne’e empossadu nain tolu atinje ona, no husu ba sira atu asume responsabilidade ne’ebé ho profissional.
“Haree ba tempu ne’ebé ita-boot sira dedika ona ba majistratura, ha’u konsidera katak ita-boot sira iha méritu no esperiénsia ne’ebé naruk tebtebes. Tanba ne’e, ha’u fiar katak kurríkulu ezemplar no nível kompeténsia, dedikasaun no zelu ne’ebé aas no oinsá mak ita-boot sira sempre korresponde ita-boot sira-nia perspetiva responsabilidade profisionál, ne’ebé antesipadamente, hau bele garantia katak MP, nu’udar instituisaun Estadu nian, ne’ebé kolabora hodi halo justisa, sei benefisia kualidade hosi ita-boot sira-nia servisu nu’udar majistradu”, PJR subliña.
Inspetora MP empossada ne’e, Angelina Saldanha, durante tinan-17 resin ezerse knaar majistratura ona , primeiru hanesan juiza instrusaun kriminál iha tempu Administrasaun Nasoins Unidas – UNTAET nian, depois ba fali majistrada Ministériu Públiku nian ne’e, hafoin konklui tiha I Kursu Formasaun ba Majistradu no Defensór Públiku. Nia hetan kolokasaun iha Prokuradoria Distritál Dili, no ezerse tiha mós funsaun nu’udar Prokuradora Repúblika Distritál Dili, dezde tinan-2013, to’o ohin loron sai hanesan Inspetora MP.
Alfonso Lopez, ne’ebé sei hahú ezerse kargu nu’udar Prokuradór Repúblika Distritál Dili, nu’udar majistradu MP durante tinan-8 resin ona. Nia ezerse tiha mós majistratura iha Prokuradoria Repúblika Distritál Suai, Oecusse no Baucau, no ida ikus ne’e ezerse funsaun nu’udar Prokuradór Distritál dezde tinan-2014 to’o agora.
Ivónia Maria Guterres, ne’ebé sei ezerse funsaun nu’udar Prokuradora Repúblika Distritál Baucau, hanesan Prokuradora Repúblika ne’ebé ezerse majistratura durante tinan-17 resin ona, primeiru hanesan juíza Distritál Baucau iha tempu Administrasaun Nasoins Unidas-UNTAET nian, depois nia tama ba karreira majistratura MP nian, hafoin konklui tiha I Kursu Formasaun ba Majistradu no Defensór Públiku. Dezde tinan-2009 to’o ojhin loron, nia hala’o knaar hanesan Kuradora ba Menór sira iha Prokuradoria Distritál Dili.
PJR mós subliña katak tomada-de-posse ne’e hanesan pasu importante ida, tanba Ministériu Públiku foin ba dalauluk eskolla majistrada karreira majistratura Ministériu Públiku Timór-Leste nian hodi ezerse kargu Inspetora hodi haree ba prosesu inspesaun ba majistradu no ofisiál justisa sira MP nian.
“Responsabilidade servisu Inspesaun nian enjerál no Inspetór sira-nian, enpartikular, eskolla majistradu sira hodi hola parte iha ekipa inspesaun nian sei halo ho konsiderasaun no kuidadu, loos duni katak sai Inspetór Ministériu Públiku nian ne’e, la’ós fásil, tanba nia partikularmente tenkesér rigorozu iha nia funsaun, maibé nia sei atua tuir análize ne’ebé objetiva hosi buat hotu ne’ebé nia hetan, apresia no valoriza buat hotu tuir medida justu”, José da Costa Ximenes hatete.
PJR subliña tan katak inspetór presiza “ezerse funsaun ho espíritu abertu no konstrutivu, haree no analiza buak ne’ebé di’ak no ladi’ak ho distansiamentu ne’ebé hanesan, tenke valoriza sobremaneira vertente pedagójika, ho espesiál kuidadu iha sensibilizasaun majistradu nian kona-ba importánsia hosi ninia relasionamentu ho operadór judisiáriu sira seluk, ne’ebé evidensia iha ne’ebá, aleinde ne’e, tenke hatudu ba inspesionadu modu konduta nian hirak ne’ebé adekuadu, sinál klaru umanidade, respeitu no pontualidade nian, sein hamenus ninia autonomia”.
Serimónia tomada-de-posse, ne’ebé hala’o iha sala reuniaun Prokuradoria Jerál Repúblika nian, iha Colmera, hetan partisipasaun hosi Prezidente Tribunál Rekursu, Deolindo dos Santos, Prokuradór Distritál Suai, Matias Soares, Prokuradór Distritál Oecusse, Mateus Nessi, aleinde Xefe Gabinete PJR, Diretora Jerál PJR, diretór nasionál no xefe departamentu sira, aleinde funsionáriu no ofisiál justisa sira MP nian. (Media PJR)