Dili, Loron-17, fulan-Setembru, tinan-2025, Prokuradór Jerál Repúblika Dr. Nelson de Carvalho, no akompaña husi Adjunta-PJR Dra. Angelina J. Saldanha, Adjuntu-PJR Dr. Jacinto B. Soares no Dr. Pascásio de R. Alves hodi fó posse ba Dr. Noemio da Silva, hodi asume kargu nudár Sekretáriu Jerál-Prokuradoria Jerál Repúblika nian, no serimónia ne’e hala’o iha sala reuniaun-PJR Kolmera.
Iha serimónia ne’e, PJR hato’o votu ézitu ba empossadu iha misaun ne’ebé asume, tanba Prokuradór Jerál Repúblika iha konfiansa ba atuál SekJer nia kompeténsia, dedikasaun no sentidu responsabilidade, hodi garante la’ós deit funsionamentu efetivu no efisiente iha Servisu Apoiu Tékniku no Administrativu (SATA) nian no Sekretaria Konsellu Superiór nian, maibé mós atu enfrenta dezafiu sira ne’ebé impoin, ho espesiál importánsia iha materia jestaun orsamentál no finanseiru no Aprovizionamentu, hodi asegura legalidade, transparénsia, ekonomisidade, jere didiak osan no bein públiku sira no defende interese públiku.
Nune’e PJR mós hahtutan tan katak, funsaun SekJer nian ezije vizaun estratéjika, kapaasidade artikulasaun nian no profundu respeitu ba prinsipiu sira ne’ebé regula Ministériu Públiku (MP), no fiar katak SekJer nia atuasaun sira sei kontribui desizivamente ba fortalesimentu institusionál, hodi asegura kondisaun sira atu MP bele promove justisa ida ne’ebé asesível no efisiente ba sidadaun sira. (Media-PJR)