DILI – Prokuradór-Jerál Repúblika (PJR), José da Costa Ximenes, kuarta-feira (24/05/2017) fó tomada de posse ba Xefe Gabinete PJR ba dahuluk, Carlito Armindo de Sousa, no apela ba nia ho kuadru Ministériu Públiku sira hotu atu kontinua hala’o sira nia knaar ho responsabilidade, dedikasaun, onestidade no umildade tomak.
Durante serimónia posse ne’e, ne’ebé hala’o iha Salaun Enkontru Prokuradoria Jerál Repúblika, Kolmera, hetan posse mós Diretór Finansa no Orsamentu no Xefe Departamentu Aprovizionamentu foun, mak hanesan Jacinto Romão no Valentino Monis, respektivamente.
Tuir PJR, funsionáriu na’in tolu ne’e hetan responsabilidade ida ne’e la’os aktu de konfiansa Prokuradór-Jerál Repúblika de’it, maibé hanesan mós rekoñesimentu ida hosi instituisaun ba servisu ne’ebé sira presta ona. Relasiona ho pozisaun Xefe Gabinete PJR ne’e, ne’ebé maske prevé ona iha Orgánika ba Servisu Apoiu Tékniku no Administrativu Prokuradoria Jerál Repúblika nian (Dekretu-Lei n.º 6/2010), foin ba dahuluk mak preense pozisaun ida ne’e.
“Ha’u hanoin durante tempu ne’e dala barak Prokuradór-Jerál ho Adjunta presiza fokus liu iha jestaun administrasaun finansa invés de ita fokus ba kestaun seluk ne’ebé mak objetivu boot ne’ebé ita destaka iha Ministériu Públiku, ho nune’e mak kompeténsia finanseira nian entrega ba xefe gabinete hodi bele toma konta”, tenik PJR.
PJR rekomenda liu tan katak espíritu servisu ekipa, hamutuk ho Diretora Jerál, Diretora Rekursu Umanu, Xefe Departamentu no funsionáriu sira hotu tenke la’o nafatin hodi garante katak Servisu Apoiu Tékniku no Administrativu (SATA) Prokuradoria Jerál Repúblika nian ne’e atende didi’ak ba ninia misaun mak fó suporta ba majistradu sira hodi sira bele hala’o sira nia funsaun ho di’ak.
Iha juramentu ne’ebé empossadu na’in tolu sira ne’e halo, hateten katak sira prontu duni atu asume knar ne’ebé sira simu hodi serve Estadu ho responsabilidade no tuir lei ne’ebé vigora ona iha Timor-Leste.
Nune’e mós, PJR informa ba funsionáriu sira hosi rejime jerál no rejime espesiál katak sei kontinua esforsu hodi kria kondisaun servisu di’ak liu, aleinde mós hato’o katak prosesu promosaun, progresaun no disiplina, ne’ebé la’o hela ho di’ak iha MP, sei mantein nafatin. (Média PJR)