Dili, Loron-18, fulan-Jullu, tinan-2025, Prokuradór Jerál Repúblika Dr. Nelson de Carvalho, hamutuk ho Adjuntu-PJR Dr. Jacinto Babo Soares, nudár Prezidente Juri ho ekipa ba rekrutamentu Vaga Ofisiál Justisa (OJ) V kursu nian, halo enseramentu ba formasaun iha faze teoria ne’ebé hala’o durante fulan neen hahú husi fulan-Janeiru too fulan-Jullu, iha Sentru Formasaun Jurídika no Judisiária kaikoli, nune’e mós halo abertura estájiu ba formandu sira ne’ebé mak sei hala’o durante fulan neen iha Prokuradoria Jerál Repúblika.
Iha biban ne’e Dr. Jacinto hato’o relatóriu badak hahú husi inisiu rekrutamentu nian too mai ohin loron ba PJR no nafatin enkoraja formandu nain sanulu resin-neen no hato’o susesu ba formandu Ofisiál Justisa estajiáriu sira no espera katak sei hasoru malu fila fali iha faze finál.
Nune’e iha breves palavras, PJR Dr. Nelson, hato’o agradese ba formadór sira husi parte Ministériu Públiku (MP) nian, ne’ebé mak durante ne’e fó formasaun no hanoin sira konaba servisu MP nian, no hato’o mós Bemvindu ba Ofisiál Justisa estajiáriu sira, no PJR husu durante iha períodu estájiu nian, atu aproveita didi’ak no prinsipál liu labele moe atu husu informasaun sira. (Media-PJR)