Oecusse, Loron-10, fulan-Juñu, tinan-2025, Prokuradór Jerál Repúblika Dr. Nelson de Carvalho, hala’o vizita traballu ba Prokuradoria Repúblika Primeira Instánsia Oecusse. Iha vizita traballu ida ne’e hodi bele haree direita Instalasaun no servisu sira iha PRPIO, nune’e iha vizita ne’e mós PJR husu ba Ofisiál Justisa sira tenke elabora prosesu sira ho didi’ak, organiza didi’ak evidénsia sira no koloka tuir fatin, tenke responsabiliza ba servisu ne’ebé mak Prokuradór sira delega ba.
Iha vizita ne’e mós Koordenadór PRPIO Dr. Mateus Nesi, hato’o agradesimentu ba PJR tanba bele mai haree dereita servisu, ekipamentu no instalasaun sira PRPIO nian. Koordenadór mós husu ba PJR ba oin presiza aumenta tan Prokuradór ida, no Ofisiál Justisa nain-ida.
Entretantu iha vizita ne’e mós, PJR halo sorumutu ida ho Juíz sira iha Tribunál Judisiál Primeira Instánsia Oe-cusse, hodi ko’alia konaba kooperasaun servisu entre MP ho Tribunál iha Regiaun Administrativa Espesiál Oe-Cusse Ambenu.
Nune’e kontinua iha loron-11, fulan-juñu, tinan-2025, Prokuradór Jerál Repúblika, hamutuk ho Koordenador Prokuradór Repúblika Primeira Instánsia Oe-cusse Dr. Mateus Nesi hala’o enkontru mós ho entidade seguransa sira hosi Regiaun Administrativa Espesiál Oe-Cusse Ambenu, hanesan; PNTL, UPF, Imigrasaun, no Alfandega. Objetivu husi enkontru ida ne’e hodi hametin liutan liña koordenasaun entre parte relevante sira. Enkotru ne’e hala’o iha Sala enkotru Prokuradoria Repúblika Primeira instánsia Oe-cusse. (Media-PJR)