Dili, Loron-04, fulan-Juñu, tinan-2025, Prokuradór Jerál Repúblika (PJR), Dr. Nelson de Carvalho, akompaña mos hosi Prokuradora Repúblika, Dra. Lídia Soares, halo vizita kortezia ida ba instalasaun Polisía Sientifiku Investigasaun Kriminál (PSIK), iha vizita ne’e simu direta hosi Diretór PSIK, Dr. Vicente F. Britos no kargu xefia sira iha PSIK.
Hafoin simu tiha PJR, Diretór ho ekipa kontinua aprezenta kedan setór sira ne’ebé instala ka eziste iha PSIK no iha biban ne’e, resposavél kadan setór sira esplika klean liu konaba papél ida-idak nian. hafoin termina tiha vizita, PJR kontinua enkontru kedan ho Diretór PSIK no kargu sefia sira hodi diskuti konaba prosesu sira ne’ebé mak Ministériu Públiku delega ba PSIK.
Iha okaziaun enkontru nian, Diretór PSIK hato’o agradese ba disponibilidade PJR nian hodi vizita ba instalasaun PSIK nian, “liu hosi vizita ida ne’e, hatudu sinál aproximasaun ida ba malu hodi mantein komfiansa ba malu no kooperasaun servisu entre PSIK ho MP, fiar katak MP nafatin fó komfiansa ba PSIK; hatete Diretór PSIK liu hosi enkortu ne’e”.
Iha biban ne’e mos PJR hatete katak, “MP laiha duvida atu delega prosesu relevante sira mai PSIK, tanba ha’u laiha duvida ho kualidade investigasaun PSIK nian, tanba ita nafatin mantein kooperasaun institusionál hodi mellora di’ak liutan ita nia servisu, liu-liu ba prosesu sira ne’ebé delega mai PSIK.” ( Media-PJR)