Dili, Loron-23, fulan-Jullu, tinan-2025, Prokuradór Jerál Repúblika Dr. Nelson de Carvalho, hamutuk ho Adjuntu-PJR Dr. Pascásio de R. Alves, partisipa iha serimónia lansamentu livru Kódigu Sivíl Timor-Leste ho dalen tétum no Anotadu-2025, serimónia ne’ebé lansa husi Prezidente Repúblika, Dr. José Ramos Horta iha jardim edifísiu Tribunál Rekursu Kaikoli ne’e ho objetivu hodi hametin instituisaun estadu nian no essensiál atu promove dezenvolvimentu sustentável no konsolida setór justisa liuhosi hadi’a kapasidade instituisionál no dezenvolvimentu instituisionál.
Nune’e iha intervensaun Prokuradór Jerál Repúblika hateten, Kódigu Sivíl Timór nian tuir sistema dominante daudaun ne’e, modela tuir buat ne’ebé hanaran “klasifikasaun jermániku ba ramu sira direitu nian”. Tanba ne’e, distinge entre seksaun jerál ida, ne’ebé maka sai hanesan asuntu hosi Livru I, no seksaun espesiál haat, maka hanesan: Lei Obrigasaun sira, Lei Propriedade, Direitu Família, no Lei Eransa nian. Seksaun sira-ne’e estabelese prinsípiu no regra sira ne’ebé regula aspetu essensiál sira hosi ema nia moris sosiál katak, saida maka komún ba ema hotu. (Media-PJR)