DILI – Prokuradór-Jerál Repúblika (PJR), José da Costa Ximenes, hato’o relatóriu mensál ikus ba mandatu Prezidente Repúblika Taur Matan Ruak nian tersa-feira (02/05/2017), iha Palásiu Prezidente Nicolau Lobato.
“Ohin hanesan ita hotu hatene katak enkontru mensalmente ho ita nia Prezidente Repúblika ne’e hanesan ikus nian, tanba iha fulan oin mai sei enkontru fali ho ita nia prezidente foun Dr. Francisco Guterres Lú-Olo no hanesan Prokurador-Jerál sei kontinua disponibiliza oinsa bele fó nafatin informasaun kontínuu hanesan buat ne’ebé mak halo tiha ona durante ida ne’e”, dehan PJR ba jornalista sira.
PJR informa tan katak durante enkontru ne’e mós hato’o kona-ba prioridade sira ne’ebé sei hala’o iha tinan haat oin mai ho sentidu atu esforsu nafatin hodi hasa’e liu-tan efisiénsia no kualidade servisu sira Ministériu Públiku.
“Ami nia planu ba oin ne’e tenke mantein pendénsia iha nível ne’ebé estável, aumezmu tempu haforsa nafatin kombate ba korrupsaun, kriminalidade organizada no krime koneksu sira no haforsa liu tan mekanizmu sira rekuperasaun ativus atu bele hadau tiha ajente kriminozu sira nia vantajen patrimoniál hirak ne’ebé sira hetan hosi krime, aleinde hala’o divulgasaun no sosializasaun lei fundamentál sira no buka nafatin lori justisa besik liu ba sidadaun sira liu hosi desentralizasaun servisu sira Ministériu Públiku nian, aleinde prioridade balun tan inklui hasa’e papél MP nian iha defeza no promosaun vítima sira ne’ebé vulnerável liu, liu-liu sira ne’ebé vítima hosi krime ne’ebé bazeia ba jéneru, no iha defeza direitu koletivu no difuzu sira”, haktuir PJR.
PJR mós akresenta liu tan katak durante tinan haat iha mandatu dahuluk (2013-2017) konsege atinje redusaun pendénsia makaas, aleinde hasa’e Ministériu Públiku nia atuasaun iha área espesializada balun hanesan kombate korrupsaun no kriminalidade organizada no kontensiozu Estadu, aleinde hametin no aumenta koperasaun institusionál iha rai laran no rai liur.
Iha parte ikus enkontru refere, Prezidente Taur Matan Ruak oferese prezente murak ho símbolu kaebauk ba PJR hanesan jestu agradesimentu ba servisu ne’ebé PJR hala’o tiha ona no mós ba mandatu daruak PJR nian ne’ebé mak sei kontinua tan iha tinan haat nia laran oin mai hodi lidera nafatin Ministériu Públiku. (Média PJR)