DILI – Prokuradór-Jerál Repúblika (PJR), José da Costa Ximenes, hato’o relatóriu mensál situasaun kriminalidade iha territóriu Timor-Leste no servisu Ministériu Públiku (MP) nian dahuluk ba Prezidente Repúblika, Francisco Guterres Lú-Olo, ne’ebé simu posse iha loron-20, fulan-maiu, foin lalais ne’e. Durante enkontru ne’e, ne’ebé regulármente hala’o entre Xefe Estadu ho PJR, iha Palásiu Prezidensiál Nicolau Lobato, tersa, (06/06/2017), PJR mós aproveita hato’o ninia felisitasaun no votu bom susesu ba Prezidente Lú-Olo.
Hafoin reuniaun ne’e remata, PJR informa ba jornalista sira katak, MP kopera hamutuk ho Polísia Nasionál Timor-Leste (PNTL) halo atuasaun kedas ba kazu krime sira ne’ebé mak akontese foin lalais ne’e, hodi nune’e rezulta ba identifikasaun suspeitu sira no konsege foti lalais medida ba ema sira ne’e.
“Situasaun kriminál ikus akontese iha fatin-fatin, hanesan foin dadaun akontese iha loron-31; fulan-maiu ne’e iha Ainaru, Hatu-Builiko, ne’ebé karreta rua estraga, suspeitu sira na’in 11 ita kaer ona hodi prosesu tuir Lei, agora dadaun iha ona prizaun preventiva”, dehan PJR.
Nune’e mós, PJR hato’o katak situasaun balun ne’ebé akontese iha Munisípiu Baukau, parte Bukoli nian, ne’ebé sunu uma iha ne’ebá, suspeitu sira ba kazu ne’e hamutuk ema na’in 13 konsege kaer ona no, liu hosi pedidu MP nian, Tribunál Distritál Baukau fó ona aprezentasaun periódika ba sira.
Relasiona ho krime sira ne’ebé foin dadauk mosu iha kapitál Dili, PJR hato’o katak prosesu investigasaun loke ona no la’o dadaun, inklui ba insidente sira ne’ebé akontese iha área Bebonuk no Kampu Tuti, suku Komoro. Kona-ba krime iha Kampu Tuti ne’e, ne’ebé rezulta uma rahun, suspeitu ema nain ha’at konsege kaer kedas no Tribunál Distritál Dili fó ba sira aprezentasaun periódika.
“Funsionamentu Ministériu Públiku nian la’o normal, no ita boot sira bele haree nota katak situasaun kriminalidade ne’ebé akontese ita atua kedas, ne’e katak servisu MP la’o di’ak tebes”, tenik PJR.
Iha ponto de vista Prezidente Repúblika nian, husu ba MP atu mantein esforsu para bele kombate krime sira ne’ebé akontese, aleinde apela ba MP ho PNTL tenke la’o hamutuk nafatin atu bele halo atuasaun ba krime eleitorál ruma ne’ebé mak karik bele mosu ba eleisaun parlamentár. PR mós hato’o ninia preokupasaun ba krime sira ne’ebé mak bazeia ba jéneru, hanesan violasaun seksuál no abuzu seksuál ba menór sira, ne’ebé sai hanesan mós kestaun importante ida ba Prokuradoria Jerál Repúblika. (Média PJR)