Dili-Prokuradór Jerál Repúblika (PJR), José da Costa Ximenes ho Komandante Jerál Polísia Nasionál Timor-Leste (PNTL), Júlio Hornai, tersa feira (21/02/2018) fó sai ona rezultadu ezame aimoruk kontentór 9 ho nia todan hamutuk tonelada 162 ne’ebé deskomfia droga, rezultadu ne’e pozitivu tebes atu suporta prosesu investigasuan tuir mai.
“Iha semana hirak liu ba Polísia Nasionál Timor-Leste (PNTL) servisu hamutuk ho Ministériu Públiku (MP), konsege halo aprensaun ba objetu kontentor 9 nune’e sumbete kedan ba primeiru integretoriu, PNTL ho MP kria ekipa ida hodi halo ezame ba objetu sira ne’e, sasan sira ne’e laos ho total 150 tonelada maibé 162 tonelada, tanba PNTL nia koperasaun diak ho Badan Narkotika Indonesia, entaun ita halo ezame ba aimoruk sira ne’e iha Indonesia”, hatete Prokuradór Jerál Repúblika ba jornalista sira iha sala enkntru Konsellu Superiór Ministériu Públiku.
Relasiona ho segredu justisa iha biban ne’e mos Prokuradór Jerál Repúblika ho Komandu Jerál PNTL la fó sai involbimentu autór sira ba aimoruk sira ne’e, “materiál sira ne’e sei iha faze investigasuan no sei sujeita ba segredu justisa entaun ami labele fó informasaun detallu konaba involbimentu se-se, oinsa, tanba sa, ami labele fó esplikasaun kelan”, tenik Prokuradór Jerál Repúblika.
Prokuradór Jerál Repúblika realsa tan katak “rezultadu ne’ebé ita simu ona, ohin hau ho komandante Jerál PNTL, ami loke hosi aitem sanuresin ualu ne’e rezultadu pozitivu tebes atu suporta investigasuan inisiál ne’ebé ita halo tiha ona, maibé detallu liu, hau labele kolia, tanba sei sujeita ba segredu justisa, maibe hau hanoin objetu ho nia todan tonelada 162 ne’e presija komunidade sira hetan informasaun, ami lakoalia konaba materiál no objetu sira ne’e, maibé ami kolia katak rezultadu ne’ebé ita halo ne’e pozitivu tebes no suporta ita nia investigasuan ne’ebé halo tiha ona, dehan Prokuradór Jerál Repúblika.
Iha okaziaun ne’e mos Komandante Jerál PNTL, Komisáriu Julio Horna, afirma katak, “bainhira sei iha hela faze investigasaun ne’ebé seidauk remata ita seidauk bele kolia klean konaba prosesu ne’e, saida mak PJR koalia ne’e, ida ne’e mak dalan ne’ebé ita atu liu ba iha prosesu investigasuan, ita sedauk koalia buat ruma karik prosesu investigasaun seidauk ramata, materiál ida ne’e apoiu teb-tebes prosesu investigasaun hodi to’o nia rohan mak ita foin hatene lolos aimoruk ne’e, hafoin ita bele kolia sai nia rejultadu ba públiku” dehan Komisáriu Julio Hornai, (Média PJR/ Mariano da Conceiçãoi)