Dili-Prokuradór Jerál Repúblika (PJR),  José da Costa Ximenes, segunda feira (12/02/2018) hasoru Prezidente Repúblika, Francisco Guteres Lú-Olo, iha Palasiu Prezidente Nicolao Lobato hodi informa rezultadu servisu sira iha Ministériu Públiku (MP) durante fulan janeiru nia laran nune’e mos informa ba Prezidente konba-ba rezultadu retiru anuál Prokuradoria Jerál Repúblika ho Konsellu Superiór Ministériu Públiku (KSMP) nian ne’ebé halao tiha ona iha fulan janeiru nia laran.

Informa ba Prezidente Repúblika kona-ba rezultadu retiru anuál Prokuradoria Jerál Repúblika ho KSMP nian ne’ebé halao iha fulan janeiru nia laran, hosi rezultadu ida ne’e, informasuan ne’ebé ami relata mak prekupasaun gabinete kontezioju estadu nian, tamba iha tribunál kuaze ita iha problema uitoan ba kazu sivil sira, tanba kazu sivil sira barak, tamba ne’e ami koalia hela tribunál atu oinsa bele tau matan ba servisu sira espesializadu MP nian iha gabinete sentrál kombate korupsaun no gabinete kontiozu estadu, ne’ebé kaer deit mak kazu sira kona ba administrasaun, informa Prokuradór Jerál Repúblika.

Aliende ne’e, Prokuradór Jerál Repúblika mos imforma konaba inspeksaun ba Prokuradór Repúblika sira iha MP, “inspeksaun ordináriu ba Prokuradór Repúblika sira ne’ebé servisu kompleta ona tinan tolu bele hetan inspeksaun, nomos halo inspeksaun ba dahuluk ba ofisial justisa sira, atu bele hetan promosaun, hosi ofisiál dilijensia ba adjuntru eskrivaun, balun adjuntu eskrivaun ba eskrivaun-de-dereitu no sekretaria” tenik Prokuradór Jerál Repúblika.

Entertantu Prokuradór Jerál Repúblika mos la simu ho desizaun Tribunál nian kona-ba aimoruk kontentór sia ne’ebé MP ho PNTL halo aprensaun, “Informa mos ba Prezidente konba ba servisu MP ho PNTL nian ne’ebe konsege halo aprensaun ba kontentor sia, indikasaun forte katak sasan sira ne’e materiál atu produs droga ne’ebé risku boot liu hosi droga babain, ita aprezenta ba Primeiru interogratoriu no Tribunál fó aprezentasaun periodika, hanesan Prokuradór Repúblika ita respeita desizaun ida ne’e, mais ami nia posisaun la simu desizaun ida ne’e ami halo rekursu no agora  prosesu rekursu hela, esklarese Prokuradór Jerál Repúblika ne’e.

Prokuradór Jerál solisita tan katak, aprezentasaun periodika laos ba sidadaun estranjeiru ne’ebé laiha nia rezidensia propriu, “ita imagina tok, sidadaun estranjeiru ita fó aprezentasaun periodika, entaun nia hela iha ne’ebé mak halo aprezentasaun periodika, tamba ida ne’e mak hau preokupa tamba sidadaun Indonézia iha ita nia nasaun ne’e laiha nia rezidensia no hela fatin propriu, depois ita fó aprezentasaun periodika ne’e ita atu ba buka iha ne’ebé karik ema ne halai.

Iha okaziaun ne’e mos Prokuradór Jerál Repúblika realsa tan katak, rejultadu hosi teste laboratoriu, ba aimoruk kontentór sia ne’e, sei fó sai nia rejultadu iha semana ne’e nia laran “informa mos ba Prezidente kona-ba ekipa ida ne’ebé envolve mos Prokuradór Repúblika ida agora dadaun iha hela Jakarta-Indonézia hodi halo teste laboratoriu ba aimoruk kontentór sia ne’e liu  hosi kooperasaun ne’ebé PNTL ho Badan Nakortika Indonézia akordu, rejultadu semana ida tan sei fó sai atu bele ajuda liu tan prosesu ida ne’e, ita hotu preokupa ho krimi organizadu, tamba ne’e ita tenke esforsu hamutuk laos Prokuradór deit maibé ita hotu”, tenik Prokuradór Jerál Repúblika. (Média-PJR/Mariano da Conceição)