DILI – Prokuradór Jerál Repúblika (PJR), José da Costa Ximenes, iha segunda-feira (07/08/2017) foin lalais, hala’o enkontru mensál ho Prezidente Repúblika (PR), Francisco Cuteres Lú-Olo, hodi informa kona-ba andamentu servisu turnu Ministériu Públiku nian durante férias judisiário nian, ne’ebé hahú tia ona iha loron-1, fulan-agustu, to’o loron-15, fulan-setembro, nune’e mós PJR informa konaba situasaun kriminalidade iha territóriu Timor-Leste.

“Mezmu iha férias judisiáriu, maibé majistradu sira kontinua halo servisu hanesan turnu ba kazu sira ne’ebé urjente hanesan sumáriu no primeiru interrogatório ne’e, ita nia majistradu sira kontinua garante servisu turnu la’o hanesan bai-bain”, hatete PJR ba jornalista sira iha Palásiu Prezidensiál Nicolau Lobato.

Tanba ne’e, tuir PJR maske férias judisiáriu hela, maibé ho esforsu ne’ebé iha hatudu katak servisu justisa ninian kontinua nafatin mantein pozisaun atu nune’e prosesu krime ne’ebé iha bele la’o ba oin di’ak liu tan.

Aleinde ne’e, Prezidente Repúblika mós louva ba esforsu no progresu sira iha Ministériu Públiku, tanba durante ne’e hatudu ninia produtividade di’ak tebes, nune’e nia husu atu MP kontinua esforsu no kria nafatin koperasaun di’ak ho instituisaun sira seluk hodi kombate kriminalidade iha nasaun Timor-Leste. (Media PJR)