DILI – Prokuradór-Jerál Repúblika (PJR), José da Costa Ximenes, halo lansamentu ba website XV Enkontru Prokuradór-Jerál Repúblika sira hosi Komunidade País sira Lian Portugés  (CPLP) nian, sesta-feira (18/08/2017) foin lalais ne’e. Fórum refere, ne’e iha ninia edisaun da-XV prezide hosi PJR Timor-Leste ba dahuluk, sei realiza iha Dili hosi loron-25 to’o loron-27, fulan-outubru oin mai ne’e.

Iha ninia diskursu badak, PJR hato’o katak objetivu website refere, ne’ebé bele asesu liu hosi enderesu www.mp.tl/cplp, mak atu divulga informasaun sira kona-ba XV edisaun Enkontru Prokuradór-Jerál Repúblika CPLP nian ba públiku, membru sira, xefe delegasaun no membru ekipa de servisu sira ne’ebé atu mai partisipa.

 “Durante enkontru ba preparasaun reuniaun ne’e, ita kontinua divulga nafatin informasaun sira kona-ba atividade sira ne’ebé hala’o, atu nune’e iha aprezentasaun ita nia komunidade sira bele akompaña iha website CPLP nian, tanba hafoin enkontru sei iha deklarasaun ida hanaran deklarasaun Dili hodi asina memorandu entendimentu ida hosi maluk Prokuradór-Jerál Repúblika CPLP sira ne’ebé mai partisipa iha enkontru ida ne’e”, tenik PJR.

PJR realsa tan katak iha website CPLP ne’e mós sei publika fotografia no vídeo kona-ba fatin turízmu, kultura no hotel sira ne’ebe estabelese iha territóriu Timor-Leste, ho objetivu atu promove ita nia potensialidade ba ita nia bainaka sira hosi nasaun sira CPLP nian.

Aleinde ne’e, PJR mós deklara katak ba sente katak oportunidade atu sai uma-na’in ba XV Enkontru Prokuradór-Jerál sira CPLP nian sai hanesan previléjiu boot ida ba Prokuradoria Jerál Repúblika Timor-Leste, no tenke esforsu no servisu makas nafatin hodi realiza enkontru ne’e la’o ho susesu.

Iha serimónia lansamentu ne’e, hetan partisipasaun hosi Adjunta Prokuradór Repúbilka, (APJR), Dra. Zélia Trindade, Prokuradór Repúblika Distritál Suai, Oecusse, Dili no Baucau, membru Konsellu Superiór Ministériu Públiku nian, Prokuradór Repúblika balun, Xefe Gabinete PJR, Diretora Jerál PJR, Xefe Departamentu no funsináriu sira iha nasionál. (Média PJR)