Díli- Iha segunda, loron-17, fulan-dezembru, tinan-2018, Prokuradór-Jerál Repúblika (PJR), Dr. José da Costa Ximenes akompaña hosi Adjuntu Prokuradór-Jerál Repúblika (APJR), Dr. Alfonso Lopes, hato’o relatóriu servisu durante fulan-Novembru to’o  Dezembru ba Prezidente Repúblika, Dr. Francisco Guteres Lu-Olo, iha Palasiu Prezidensial Aitarak Laran, Dili.

Prokuradór-Jerál Repúblika, Dr José da Costa Ximenes iha enkontru ne’e informa ba Prezidente Repúblika kona-ba atividade sira ne’ebe mak Ministériu Públiku hala’o tiha ona iha fulan-Novembru to’o Dezembru no iha biban ne’e lori  mós APJR Dr. Alfonso Lopez hodi mai kumprimenta Prezidente Repúblika. “Enkontru ida-ne’e hanesan enkontru ba dahuluk nian hafoin tiha tomada-de-pose ba ha’u-nia adjuntu Prokuradór-Jerál” dehan PJR ba jornalista sira hafoin ramata enkontru ho PR.

Prokuradór-Jerál Repúblika informa mós ba PR kona-ba nomeiasaun Prokuradór Distritál Dili no Baucau nian. “Hafoin tomada-de-pose Dr. Alfonso Lopez ba APJR, kargu Prokuradór Distritál Díli automatikamente sai mamuk tanba antes ne’e Dr. Alfonso Lopez mak okupa kargu ne’e, nune’e iha loron-6, fulan-Dezembru, Konsellu Superiór Ministériu Públiku (KSMP) deside nomeia Dr. Jacinto Babo Soares hodi asumi fali kargu nu’udar Prokuradór Distritál Dili  ho komisaun servisu tinan tolu.

Iha biban ne’e, KSMP nomeia Dra. Remizia de Fátima asumi kargu nu’udar Prokuradora Distritál Baucau ho komisaun servisu tinan tolu no transfere fali Dra. Ivonia Guteres ba Prokuradoria Distritál Díli. KSMP mós deside hodi nomeia fali Prokuradór foun ba Prokuradoria Distritál  Suai, hodi troka Dr. Matias Soares tanba ninia komisaun servisu termina ona iha loron-31, fulan-Novembru foin lalais ne’e, nune’e mós Prokuradór Distritál Oecusse, Dr. Mateus Nessi KSMP deside hodi estende tan komisaun servisu ba tinan tolu no eis Adjunta Prokurador-Jerál Repúblika, Dra. Zélia Trindade KSMP nomeia ba kargu hanesan inspetora, hodi reforsa sevisu inspesaun iha MP, tenik nia.

Entretantu iha reuniaun ne’e mós Prokuradór-Jerál Repúblika, informa ba Prezidente Repúblika kona-ba delegasaun kompetensia ba APJR foun”, Prokuradór-Jerál Repúblika, deside ona hodi fó delegasaun kompetensia iha área tolu ba APJR, mak hanesan; tau matan ba servisu Gabinete Kombate Korrupsaun no Kriminalidade Organizada, área kooperasaun internasionál nian, kriminalidade transnasionál ne’e ita kolia  barak se laiha rezultadu bainhira laiha kooperasaun internasional, nune’e mós APJR haree kona-ba servisu administrasaun no finansa Prokuradoria-Jerál Repúblika nian”.

Prokuradór-Jerál Repúblika solisita tan katak, hafoin Prezidente Repúblika rona tiha informasaun sira ne’e, PR fó totalmente konfiansa ba MP atu hala’o knaar sira tuir lei, (Media MP).