Dili, Timor-Leste – Prezidente Repúblika Dr. Francisco Guterres Lú-Olo husu ba Ministériu Públiku Timor-Leste atu hadi’ak liután servisu MP hodi kombate korrupsaun iha tinan 2018 ne’e tanba krime korrupsaun sai ona nu’udar preokupasaun públiku iha país ne’e.
Prezidente Repúblika hato’o mensajen ne’e depois enkontru mensál ho Prokuradór Jerál Repúblika Dr. José da Costa Ximenes, ne’ebé hala’o iha Palásiu Prezidensiál iha Tersa (09/01/2018) hodi informa funsionamentu Ministériu Públiku nian iha fulan Dezembru nian.
Tuir PJR, Prezidente Repúblika husu atu MP serbisu maka’as iha 2018 hodi redús krime oioin ne’ebé okorre iha Timor-Leste, liliu krime korrupsaun.
PJR haktuir teni katak iha fulan Dezembru Ministériu Públiku rejista prosesu kuaze 300 resin, ne’ebé inklui prosesu sira hosi prokuradoria distritál nian.
“Prosesu ne’ebé tama besik 300 e tal inklui Distritu nian no iha Dezembru nian laran iha kazu omisídiu tolu mak akontese iha Maliana, Suai, no Baukau, i krime hirak ne’e sei iha hela prosesu investigasaun,” hatete PJR.
PJR mós salienta katak iha kazu balu ho natureza krime seksuál ne’ebé tuir rejistu aas iha Tribunál Distritál Dili, Baukau, no Suai.
Tuir PJR iha kazu krime organizada ho tipu oioin ne’ebé akontese iha Timor-Leste no ho servisu maka’as hosi Gabinete Sentrál Kombate Korrupsaun no Kriminalidade Organizada nian esforsu sira kazu hirak ne’e kuaze termina ona.
PJR haktuir katak iha reuniaun ne’e PJR informa mós katak Ministériu Públiku sei halo retiru annual loron rua iha 12-13 Janeiru 2018 hodi halo avaliasaun ba funsionamentu serbisu MP nian iha 2017, inklui dezafiu oioin ne’e enfrenta, hodi defini planu asaun anuál hodi hadi’ak dezempeñu servisu MP nian. (Média PJR/Maria Lin)