DILI – Prokuradór-Jerál Repúblika (PJR), José da Costa Ximenes, simu kondekorasaun ‘Colar da Ordem de Timor-Leste’ hosi Prezidente Repúblika, Taur Matan Ruak, iha salaun China Palásiu Presidensiál Prezidente Nicolau Lobato, Dili, sesta-feira (05/05/2017).
Hamutuk ho PJR, personalidade Timoroan na’in haat tan hetan omenajen ida ne’e, ne’ebé nu’udar kondekorasaun aas liu mak eziste iha Timor-Leste: Prezidente Parlamentu Nasionál, Aderito Hugo da Costa, eis-Prezidente Parlamentu Nasionál, Vicente Guterres, Primeiru Mi-nistru, Rui Maria de Araújo, no eis-Prezidente Tribunál Rekursu, Guilhermino da Silva.
Iha loron hanesan, Taur Matan Ruak kondekora mós servidór Estadu nian balun ho ‘Insígnia da Ordem de Timor-Leste’, inklui Vise Xefe Estadu Maior Forsa Defeza Timor-Leste (F-FDTL), Brigadeiru Filomeno Paixão, Xefe Estadu Maior F-FDTL, Koronel Falur Rate Laek, no mós Segundu Komandante-Jerál PNTL nian, Komisáriu Faustino da Costa.
Iha Xefe Estadu ninia diskursu fó agradese wain ba sira ne’ebé mak servisu importante no iha responsabilidade ne’ebé aas, hato’o ezemplu ba nasaun iha lala’ok ba sira nia funsaun oi-oin iha tempu naruk no esperiénsia.
“Ho kualidade pesoál no profisionál ne’ebé hatudu iha lala’ok no ba sira nia responsabilidade públika sai nu’udar servisu ne’ebé notável no nu’udar ezemplu ba parte kuadru sira nian ho responsabilidade iha administrasaun públika no ba nível sira hotu”, tenik Prezidente Taur Matan Ruak durante serimónia entrega kondekorasaun sira ne’e. (Média PJR)