Díli- Prezidente Repúblika, Dr. Francisco Guterres Lú-Olo, fó-pose ba Adjuntu Prokuradór-Jerál Repúblika foun, Dr. Alfonso Lopez hodi troka Eis-Adjunta Prokuradór-Jerál Repúblika, Dra. Zélia Trindade ne’ebé ninia mandatu ramata ona iha fulan-Setembru liubá. Serimónia tomada-de-pose ne’e realiza iha Tersa, loron-04, fulan-Dezembru, tinan-2018, iha Palásiu Prezidensiál Aitarak-laran Dili.

Iha Serimónia tomada-de-pose nee Xefe-Estadu hateten katak, “Adjuntu PJR foun sei hahú nia funsaun hodi haforsa servisu Prokuradoria Jerál Repúblika nian, hein katak, Adjuntu foun bele ajuda rezolve problema sira ne’ebé eziste, hanesan; prosesamentu kazu ne’ebé atrazu atu hetan justisa, tanba sira ne’e hotu bele konsidera hanesan ita nega tiha justisa ba ita-nia povu. Nune’e mós Adjuntu foun bele ajuda kombate kriminalidade sira ne’ebé mak tinan-tinan sempre aumenta’’.

Iha sorin seluk Xefe-Etadu mós hato’o votus parabens ba Dr. Alfonzo Lopes no Eis-Adjunta PJR tanba durante tinan hirak nia laran hala’o ona servisu ho profisionalizmu no dedikasaun tomak iha área Jurisdisaun.

Xefe-Estadu mós husu ba Instituisaun Jurisdisaun hotu-hotu atu halo esforsu liután hodi kontinua hadi’a nafatin ita-nia instituisaun sira ne’ebé haknaar iha Setór Justisa Formál Estadu Timor-Leste nian.

Iha biban ne’e, Prokuradór-Jerál Repúblika, Dr. José da Costa Ximenes dehan” Tomada-de-pose ida-ne’e hala’o tuir kompeténsia própriu Konstituisaun RDTL nian ne’ebé atribui ba Xefe Estadu hodi nomeia Dr. Alfonso Lopez sai Adjuntu PJR foun, ne’ebé antes ne’e públika ona iha Jornál Repúblika, iha loron-05, fulan-Setembru, tinan-2018’’.

PJR esklarese liután katak “Dr. Alfonso Lopez, merese hetan kargu ida ne’e, tanba Dr. Alfonso hanesan kuadru ida ne’ebé hetan primeiru deslokasaun hodi hala’o servisu iha Prokuradoria Distritál Suai (PDS), tanba hatudu ona progresaun servisu ne’ebé diak, nune’e, ikusmai Konsellu Superiór Ministériu Públiku nomeia Dr. Alfonso Lopez hodi lidera Prokuradória Distritál Oecusse (PDO) no Baucau (PDB), hafoin kompleta tiha ninia mandatu durante tinan 3 iha Prokuradoria Distritál Baucau, tuir mai hetan promosaun hodi kontinua lidera fali Prokuradoria Distritál Dili (PDD). Konfiansa ne’ebé Xefe-Estadu fó ba Dr. alfonso Lopez hodi asumi kargu hanesan Adjunto PJR tanba durante ne’e hatudu ona ninia matenek, dedikasaun no profisionalizmu.

PJR mós, hato’o agradesimentu espesiál ba Eis-Adjunta PJR Dra. Zélia Trindade, ne’ebé mak kumpri ona ninia mandatu servisu  ba dala  rua tutuir-malu  hodi apoiu servisu PJR nian hodi halo  konsolidasaun no hadi’a Ministériu Públiku  sai di’ak liután.

Iha fatin hanesan Adjuntu PJR foun, Dr.Alfonso Lopez mós felisita  knaar ne’ebé nia simu hodi sai nu’udar Adjuntu PJR ba periodu ida-ne’e, no sei hala’o nia servisu  ho dedikasaun tomak ba Ministériu Públiku.

“Ha’u agradese tebetebes ba konfiansa ne’ebé fó mai ha’u, ha’u asume kargu ne’e  ho umildade, totalidade no ho sentidu dever nian, ha’u promete katak sei hala’o buat hotu-hotu ho loloos no ho  responsabilidade  tomak” tenik Dr. Alfonso. (Media PJR)