DILI – Iha tersa-feira (11/04/2017) foin lalais, Primeira Dama Timor-Leste nian, Isabel Ruak Ferreira, halo vizita kortezia ida ba Prokuradór-Jerál Repúblika (PJR), José da Costa Ximenes, hodi konvida PJR sai oradór iha semináriu kona-ba Eleisaun Parlamentár ne’ebé sei realiza iha fulan-abril nia laran.
“Ita hakarak fahe informasaun ba públiku liu-liu sidadaun sira atu hatene sira nia direitu no devér hodi bele partisipa iha eleisaun, tanba foin dadaun ne’e populasaun ema na’in rihun 214 mak la hola parte iha eleisaun, ita hakarak iha Eleisaun Parlamentár hotu-hotu bele partisipa, tanba ne’e obrigasaun sidadaun nian, maske iha lei dehan la’os obrigatóriu maibé hanesan sidadaun ne’e tenki responsável, la’os ezije de’it nia direitu, tenke hala’o mós ninia devér atu partisipa iha eleisaun”, hatete Primeira Dama hafoin enkontru ne’e remata, iha edifísiu PJR, Kolmera.
Iha okaziaun ne’e Primeira Dama husu mós parte justisa nian atu fó kontribuisaun ba atu sosializa informasaun legál relasiona ho Eleisaun Parlamentár ne’e.
“Ha’u husu parte justisa nian hanesan Tribunál no Ministériu Públiku bele fó uituan informasaun ba públiku kona-ba parte legál nian, atu nune’e públiku bele komprende didi’ak hodi bele partisipa hotu iha festa demokrasia ida ne’e, nune’e mós ba partidu sira hodi koñese Lei partidu polítiku sira-nian ho didi’ak ba eleisaun parlamentár”.
Iha parte seluk, relasiona ho mandatu PJR nian, ne’ebé sei remata iha loron-15, fulan-abril, tinan-2017, tuir Primeira Dama nia observasaun durante tinan haat PJR lidera MP la’o ho susesu tebes.
“Ha’u fó parabéns ba PJR ninia servisu durante tinan haat ne’e tanba ita haree nia lideransa ida ne’ebé la’o ho di’ak tebes, kompara iha área justisa nian MP hala’o nia papél di’ak liu, entermus organizasaun di’ak liu ita kompara ho Tribunál, Defensór Públiku seidauk la’o ho di’ak tanba kondisoens ladi’ak no rekursu umanu la bem organizadu ho di’ak. Ha’u uluk hanesan membru Konsellu Superiór Ministériu Públiku nian, ha’u hatene no ha’u haree iha tempu ba tempu dezempeña servisu nian di’ak liu maibé tenke hadia di’ak liu tan nafatin iha futuru”. (Média PJR)