DILI – Colmera, Adjunta Prokuradór-Jeral Repúblika Dra. Zélia Trindade hala’o reuniaun ho Servisu Ordenador Nasional (SON), ho Camões I.p, iha sala reuniaun Prokuradoria Jeral Repúblika, loron Segunda-Feira (30/07/2018).

Prokuradoria Jeral Repúblika hanesan mós instituisaun ida ne’ebé halo parseiru ho Camões I.p, no Servisu Ordenador Nasional Objetivu atu mellora efikásia, integridade, transparénsia dezempeñu prestasaun servisu publiku, servisu ida ne’e hetan apoiu husi fundu dezenvolvimentu Uniau Europeia.

Objetivu husi reuniaun ne’e hodi difine no deskuti planu aktividade no nomea pontu fokal nebe sai hanesan reprezentante Prokuradoria Jeral Repúblika.

Iha reuniaun ne’e Adjunta Prokuradora Jeral Repúblika koalia katak “Ministériu Públiku agradese ba apoiu ne’ebé Uniaun Europeia fó liu-liu iha area setór justisa, Difikuldade ne’ebé setór justisa inferenta maka, prosedimentu rekrutamentu laiha kriteriu espesifiku nebe mak hare kona ba idade, aleinde ne’e formasaun ne’ebé mak realiza ona laiha kontinuasaun tamba ne’e atu hetan kualidade justisa ne’ebé mak diak husu atu formasaun ne’ebé realiza ona tenke iha nia kontinuasaun to’o finalidade”, dehan Adjunta.

Alende ne’e Adjunta Prokuradora Jeral Repúblika intrudus mós servisu no kuadru pessoal iha Ministériu Públiku, no Ministeriu Publiku mos iha planu atu halo alargamentu iha Munisípiu Lautem no Manufahi hodi lori justisa hakbesik ba povu.

Hafoin remata inkontru , Koordenador jeral PFMO, Rui Dinis hato’o katak “kontenti tebes ho onra boot ida ne’e, no preparasaun planu , elaborasaun ida ne’e sei inkaisa iha planu ho durasaun tempu naruk to’o tinan 2022, durante tinan haat ne’ebé difine ona iha akordu entre Timor Leste ho Uniaun Europeia, hateten koordenador jerál PFMO. (Media PJR)