Dili-loron-05, fulan-Outubru, tinan-2021, Prokuradór-Jerál Repúblika (PJR), Dr. Alfonso Lopez, relata informasaun prosesuál ba Prezidente Repúblika (PR), Dr. Francisco G. Lú-Olo, iha palásaiu prezidente Nicolao Lobato, Aitarak Laran, nune’e mós PJR husu PR atu partisipa iha Inaugurasaun Edifísiu gabinete Sentrál Kombate Korrupsaun no kriminalidade organizada ne’ebé sei realiza iha loron-27, fulan-Outubru, tinan-2021.
Hafoin ramata reuniaun, PJR informa katak, majistradu Judisiál sira durante férias judisiáriu ne’ebé komesa hosi loron-01, fulan-Agustu to’o loron-15, fulan-Setembru ne’e atende de’it mak kazu urjente sira liuhosi turnu, maibé komesa fali hosi fulan-setembru nia klaran mai to’o agora servisu hotu la’o normál fali ona.
Iha biban ne’e mós PJR fó-sai kona-ba númeru prosesu entrada, findus no pendete iha nivél Nasionál to’o Distritál sira, Prosesu entrada iha fulan-setembru nia laran hamutuk 483, husi prosesu ne’e sei termina akuza no arkiva sura hamutuk iha nivél nasionál prosesu 393 entre prosesu findus no akuza hamutuk prosesu 214, husi prosesu arkivadu mak 179 nune’e mós prosesu pendente agora hamutuk 3112, prosesu pendente aumenta iha fulan-Agustu tanba majistradu Ministériu Públku maiória iha férias judisiáriu, maske nune’e, prosesu entrada kontinua tama.
PJR afirma tan katak, “iha nivél Distritál sira liuliu iha Prokuradoria Distritál Dili (PDD) númeru prosesu barak mak tama iha fulan-Setembru nia laran hamutuk prosesu 312, konsegue termina prosesu 219, agora ne’e prosesu pendente iha PDD 2.266, no Prokuradoria Distritál Baucau (PDB), prosesu entrada hamutuk 76, konsegue findus prosesu 75, prosesu pendente iha PDB hamutuk 389, iha Prokuradoria Distritál Suai (PDS) prosesu entrada 56, prosesu findus 55, prosesu pendente 159, iha Prokuradoria Distritál Oe-cusse (PDO) prosesu entrada 23, konsegue termina prosesu 30 nune’e prosesu pendente agora hamutuk 82”, (Media MP).