DILI – Eskritóriu Nasoins Unidas kona-ba Droga no Krime sira (akrónimu hosi inglés, UNODC) realiza formasaun ho tópiku “Kriminalidade Ekonómika ho Finanseira” ba Prokuradór Repúblika sira ho ofisiál investigasaun sira hosi Komisaun Anti-Korrupsaun (KAK) no Polísia Sientífika Investigasaun Kriminál (PSIK).
Iha sesaun abertura, ne’ebé hala’o iha Hotel Timor kuarta-feira (23/11/2016), Prokuradór-Jerál Repúblika (PJR), José da Costa Ximenes, koalia kona-ba koperasaun di’ak no parseria ne’ebé eziste ho UNODC aleinde agradese ba Adjunta PJR, Dra. Zélia Trindade, tanba nia rasik mak iha inisiativa hodi realiza formasaun importante ida ne’e. Nia mós agradese ba UNODC nia dosponibilidade hodi bele mai fó apoiu ba Instituisaun Judisiáriu sira iha Timor Leste liu-liu ba iha Ministériu Públiku atu nune’e bele hasa’e tan majistradu sira nia koñesimentu iha área oioin.
“Konteúdu importante hosi formasaun ida ne’e atu eleva ita nia koñesimentu, reforsa ita nia esperiénsia liu tan, liu-liu atu fó atendimentu ba situasaun reál ne’ebé kriminalidade forte hanesan krime korrupsaun no kriminalidade organizada. Ministériu Públiku ho órgaun espesializadu rua mak KAK ho PSIK, hanesan parseria importante iha faze investigasaun ba krime kompleksu sira ne’e”, informa PJR.
Iha biban ne’e mós, PJR husu ba partisipante sira atu uza tempu ho didi’ak atu bele hetan netik buat balun hosi belun sira UNODC hodi bele aplika iha sira nia instituisaun.
“Tema ba ita nia formasaun ne’e interesante tebes, ita nia formasaun ne’e atu hametin liu tan ita nia koñesimentu ba iha kriminalidade organizada hodi kumpre ita nia misaun hodi kombate krime tanba arguidu sira buka hela de’it oinsá atu naok osan Estadu, oinsá atu hatama droga mai, tanba ne’e ita mós presiza lor-loron estuda”.
Iha fatin hanesan, formadór António de Vivo esplika katak formasaun ne’e kona-ba krime ekonómiku ho finanseiru ne’ebé sai hanesan fenómenu foun akontese iha Timor Leste, no sei abranje ba kontestu jurídiku no kontestu legál Timor Leste nian.
“Formasaun ne’e hanesan instrumentu ida ba MP, KAK ho PSIK atu bele uza hamutuk iha faze investigasaun nian, atu nune’e instituisaun tolu ne’e nia instrumentu investigasaun labele la’o ketak-ketak. Formasaun ne’ebé realiza durante loron tolu ne’e sei fahe ba parte rua, loron rua ba teoria no loron ida ba prátika, iha prátika nian ami sei organiza investigasaun ne’ebé kordenadu”.
Aleinde PJR no APJR, partisipa iha serimónia abertura ba formasaun ne’e Komisáriu KAK, Adérito Tilman, Diretór PSIK, Vicente Fernandes e Brito, ho formandu na’in 20. (Média PJR)